Shillong, Lber 24 : Ka Meghalaya Football Association (MFA) ka la ïoh ïa ka jingïaroh na u Chairman ka Shillong Lajong Football Club, Bah Larsen M Sawian halor ka jinglah jong ki ban wallam ïa ki jingïakhun barri ha ka sien kaba nyngkong eh ha nongbah Shillong.
Haba pynpaw ïa kane ha ka jingïalang dang shen ha Nongbah Shillong u Bah Larsen u la ong ba dei lyngba ka jingïohi jngai jong ka MFA ba ka kynhun ïalehkai phutbol jong ka India ka la poi ban iuhkjat ha Shillong bad ruh ban ïakhun ïa ka jingïalehkai paralok pyrshah ïa ka Maldives kum ka jingpynkhreh na ka bynta ka jingïakhun knieh rung sha ka AFC Asian Cup 2027.
“Halor kane nga ai ka jingïaroh ïa ka sorkar jylla kaba la wanrah ïa ki jingtei kiba paka kiba plie lad ban ïoh pynlong ïa kum kine ki lympung ïalehkai kiba heh ha Shillong. Nga kwah ruh ban ai ka jingïaroh ïa u President ka Meghalaya Football Asociation (MFA) Bah Hamlet Dohling uba la lah ban pynkohnguh ïa ka All India Football Federation ban pynlong ïa kine ki jingïakhun kiba heh ha nongbah Shillong,” u la ong.
Da kaba pynpaw ba u la bat kum u dkhot jong ka AIFF la kumba 10 snem ei ei, u Bah Larsen u la ong ba kam dei satia kaba suk ban pynkohnguh ïa ka Executive Committee jong ka AIFF hynrei hapoh ka jingïalam jong u Bah Hamlet ki la lah ban leh ïa kata haduh ba ïa kane ka jingïalehkai la lah ba wallam sha nongbah Shillong ha ka sien kaba nyngkong.
U ong ruh ba da kane ka sienjam, ka don ka jingkyrmen ïa ka Meghalaya ba kan lah ban pynlong kham bun shuh ki lympung ïalehkai kiba kham heh nangne shakhmat.
Lah ruh ban kdew hangne ba ka kynhun ïalehkai ka Ri ka la lah ban pynliem haduh 3-0 kol ïa ka Maldives ha ka jingïakhun kaba long ha ka 19tarik mynta u bnai. Ka jingïakhun kaba kham shongshit kan dei ha kane ka sngi Ba-ar ka 25tarik pyrshah ïa ka Bangladesh kaba dei ruh ka jingïakhun knieh rung sha ka AFC Asian Cup 2027.
