Shillong, Risaw 24 : Ka Young Talent Badminton Club (YTBC), Mawlai ha ka sngi Nyngkong ka la ïoh pdiang ïa ka song jingkyrshan pisa na u MLA ka thain Bah PT Sawkmie na ka bynta ban pynlong ïa ka lympung ïalehkai badminton ba la tip kum ka State Level Prize Money Badminton Tournament kaba kin sa pynlong shen ha nongbah Shillong.
Ha kane kajuh ka sngi, u MLA u la nohsynniang ruh da ka song pisa sha u khynnah ïalehkai kickboxing, u Winningstar L . Nonglait, na ka dong Nongpathaw, Mawlai Mawdatbaki u ban leit ïakhun sha Delhi bad un mih na nongbah Shillong ha ka 30 tarik Risaw, 2022.
Haba ai jingkren ha i jingïalang balyngkot u Bah PT Sawkmie u la kitbok bad kyrkhu kyrdoh ïa ka YTBC halor ka jingpynïaid jong ka ïa ka lympung Badminton, ba kan long kaba jop bad kaba ïaid beit ïaid ryntih.
Ha kajuh ka por u la kitbok bad kyrkhu kyrdoh ruh ïa u Winningstar u khynnah ïalehkai kickboxing ba un ïoh khur ka jingjop ha kane ka jingleit ïakhun jong u sha Delhi. Ha kane ka sngi la ïoh ruh ïa ka jingkren na bah Wanseng Jyrwa, u working president ka UDP Mawlai Circle, ïa kaba u pyrto ïa u MLA uba la shimkhia ban kyntiew ïa ki kam ïalehkai sport bad u pynpaw ruh ba ki sakhi ïa kane da la ki jong ki khmat haba ïa dei bad ka jingïarap jong u ïa kiba bun ki sports club bad kiwei ki nongïalehkai.
Haba kren bad u nongthoh khubor u samla Donborson Warjri, President ka YBTC u pynpaw ba ki la dep pan jaka ban pynlong ha NEHU ïa kane ka lympung ïalehkai badminton bad ïa ka tarik shen kin sa ïa pyntip paidbah.
