Ïehnoh kam u President bad Finance Secretary jong ka PDF South West Khasi Hills

Mawkyrwat, ‘Nailar 29: Ki nongkitkam ba kham hakhmat jong ka People Democratic Front (PDF) kiba bat ïa ka kam kum u President bad Finance Secretary ki la iehnoh ïa ka kam kum ki nongïalam bad nongkitkam jong ka.
Kiba la ieh noh ïa ka kam ki long u bah Kordorlyne Kharlyngdoh uba bat kum u President ka PDF Mawkyrwat Zonal Committee bad Secretary jong ka PDF South West Khasi Hills District ha ryngkat u bah P. Paliar uba bat kum u Secretary jong ka PDF Mawkyrwat Zonal Committee bad Finance Secretary ka PDF South West Khasi Hills District ki la iehnoh shi syndon ïa ka kam na ka party ha ka 27 tarik u ‘Nailar 2022
Haba kren ha ki lad pathai khubor ki la pynpaw ba ka jingiehnohkam jong ki kim don daw ei ei ïa ka party PDF hynrei ki iehnoh ïa ka kam tang namar ba ki la leit ban pynïasnoh noh ïa lade bad ka kynhun jong u bah Sounder Steong Cajee ban ai ka jingkyrshan ba pura ïa u ba un sa ïeng ïaleh ha ka elekshon MLA na ka Mawkyrwat Constituency ha u snem 2023.
Kumta naduh ka 27 tarik mynta u bnai kim dei shuh ki nongïalam bad ki dkhot jong ka People Democratic Front (PDF) hynrei ki la dei ki nongkitkam ba pura jong ka Mawkyrwat Constituency Socio Economical & Political Awareness Committee’ (MCSEPAC).
Kumta na ka liang jong ki ki la ai ka jingkitbok kitrwiang ïa ka party PDF, ïa ki MLA ba kin nang ïai kiew bad nang ïaid shaphrang ïa ki kam jong ki ha ka Party.