Lah duh ka BMHSS, JNV bad ka NHSSM ha ka jingrakhe ïa ka ‘National Sports Day 2022’ ha South West KHD
Mawkyrwat, ‘Nailar 29: Ka Balang Mawlangwir Higher Secondary School, ka JNV South West Khasi Hills District bad ka Nativity Higher Secondary School, Mawkyrwat ki la long ki lai tylli ki skul kiba la rah ïa ka nam lahduh ha ka jingrakhe ïa ka ‘National Sports Day 2022’ ba la pynlong da ka ophis jong u District Sports Officer (DSO), South West Khasi Hills District ryngkat ka District Promotion Society, South West Khasi Hills District ba la pynlong hapoh madan Artificial Turf, MDSA, Mawkyrwat.
Ka jingpynlong ïa kane ka lympung ïalehkai kaba la khot ka ‘1st Inter – School Invitation Mawpoiñ & Tug of War Competition 2022’ ka long kum ka dak jong ka jingïasnohktilang bad ka Ri India baroh kawei ha ka jingrakhe ïa ka sngi kha jong u Major Dhyan Chand uwei na ki khlur ïalehkai hockey jong ka Ri bad ka dei ruh ka snem jong ka jingkynjoh ïa ka snem kaba 117 namar la kha ïa u ha ka 29 tarik u ‘Nailar, 1905.
Haba phai ha ka jingïalehkai ba la pynlong mynta ka sngi, na ka liang ka ophis jong u District Sports Officer (DSO), South West Khasi Hills District ka la ïoh ban khot tang 8 tylli ki skul ha kaba na ka liang ki khynnah skul ki la ïoh ban ïashimbynta shitrhem bha watla ka long ka lympung ïalehkai kaba tang shi sngi.
Ha kaba kut jong ka jingïalehkai la ïoh ruh ban sam ïa ki khunsnam sha baroh ki nongjop ha kaba ka Nativity Higher Secondary School, Mawkyrwat ka la long ka nongjop ha ka jingïakoptan tyllai pyrshah ïa ka Jingïaseng Kynthei Mawkyrwat Presbytery Higher Secondary School kiba dei jong ki shynrang, katba ka Balang Mawlangwir Higher Secondary School pat ka la jop ïa ka Nativity Higher Secondary School, Mawkyrwat jong ki kynthei.
Nangta, ki nongjop ha ka jingïalehkai Mawpoiñ pat ka Balang Mawlangwir Higher Secondary School ka la jop da 42 – 28 point ïa ka JNV, South West Khasi Hills District kiba dei jong ki kynthei bad ka JNV, South West Khasi Hills District pat ka la jop da 50 – 46 pyrshah ïa ka Balang Mawlangwir Higher Secondary School jong ki khynnah shynrang.
Ïa kane ka lympung ïalehkai ba shi sngi, la plie bad pynhap pyrda da u bah Damang Synkon, District Sports Officer (DSO), South West Khasi Hills District ha ryngkat ka jingïadonlang ki nonghikai jong ki phra tylli ki skul bad kumjuh ruh ka jingsakhi lang jong ki khynnah skul kiba dei ki nongïashimbynta.