Ïalam u Dy CEM ha SWGH ban khynra Tading License, bun ki khang khyrdep ki dukan tang mar shu tip

Tura, Naitung 9: Ka Garo Hills Autonomous District Council (GHADC) ha ka sngi Balang ka la sdang ïa ka jingkhynra Trading License ha kylleng ka South West Garo Hills, da kaba jurip ïa palat 200 tylli ki dukan bad ki jaka khaii na ka bynta ki jingpynkheiñ aiñ kiba ïadei bad ka Trading by Non-Tribals (TNT) license, ka Professional Taxes bad ka jingkhaïi beain ha ki jaka ba hap hapoh ka Schuleed Sixth.
Ha kane ka jingkhynra la ïalam hi da u Deputy Chief Executive Member (CEM) ka GHADC ha ryngkat ki heh ophisar jong ka Council ka la kynthup ïa ki thaiñ Bansali, Chandamari, Mirjumla bad ki katto katne kiwei pat ki jaka kiba don ha khappud ka Meghalaya bad Assam.
Ka jingpeit bniah ka long shi bynta jong ka jingpyrshang jong ka Council dang shen ban tip ne ithuh ïa ki briew kiba khlem siew khajna jong ka da kaba ithuh ïa ka jingtrei kam bad ki kam khaïi kiba treikam khlem daioh jingbit.
Ki heh ophisar ki la iathuh ba bun bah ki jaka treikam ne ki dukan la kynnoh ba ki treikam khlem ki laisen kiba biang bad kiwei kiwei ki kot aiñ kiba donkam ban treikam ha ka jaka ba hap hapoh ka Sixth Schedule.
La lap ruh ba katto katne ki kam khaïi ki la leh bym suidniew ban siew ïa ka Professional Tax, katba la iathuh ba bun ki trai dukan ki la khang ïa ki jaka treikam jong ki bad ki la phet krad hadien ba ki la tip ïa katei ka jingjurip.
U Deputy CEM u la ong ba ka Council mynta kan leh da kaba tyngeh ban peit bniah la ki nongkhaïi ki bym dei riewlum kiba treikam ha ka jaka jong ka Sixth Schedule ki kohnguh ne em ïa ki aiñ bad ki siew ïa ka khajna kaba dei ban siew sha ka GHADC.
“Ngi la iohi ba bun ki nongkhaïi ki ïai bteng ban pynïaid ïa ki kam khlem da siew ïa ka khajna ba dei ban siew.Kane ka la wanrah ïa ka jingduhnong ha ka khajna ïa ka Council.Ngin pyrkhing bha, bad shen yn sa pynlong ïa ki jingkhynra kiba kum kine ha kiwei pat ki bynta jong ka Garo Hills”, u la ong.
Kane ka jingleh kaba thymmai ka dei ha ka sien kaba ar kaba kum kane ka jingleh jong ka GHADC ha kine ki taiew ba la dep.Kham mynshwa, ka Council ka la pynlong ïa kum kane ka jingkhynra ha Tura, ha kaba la sdang ïa ka jingleh pyrshah ïa ki katto katne ki jaka treikam, kynthup ïa ki Bank, halor ka jingbym siew ïa ka khajna Professional Tax.
Ki heh ophisar jong ka Council ki la ong ba ki jingjurip kin dang bteng ha kylleng ka Garo Hills kum shi bynta jong ka jingthmu ban pynthikna ba man la ka jaka khaïi kaba treikam hapoh ka jingpeit jong ka Council kin don ïa ki laisen kiba biang bad kan noh synñiang sha ka jingïohnong jong ka Council lyngba ka jingsiew khajna ha ka por kaba biang.