Shillong, Naitung 09 : Ka Sorkar Jylla ka la ai jingmynjur ban pynkylla ïa ka jingïasoi soskular (lease agreement) jong ka Orchid Resort ha Mawkasiang, New Shillong, ban plie lad ïa ka jingkyntiew kyrdan ïa ka sha ka kyrdan 5-Star Resort.
Haba pyntip ïa kane hadien ka jingïalang jong ka Kynhun Myntri, na ka liang u Myntri Rangbah ka jylla, u Conrad K. Sangma, u la ong ba kane ka rai ka long hadien ba ka kompani kaba shim wai ïa ka Resort ka la pan jingbit na ka sorkar jylla ban bei tyngka shuh shuh ban pynbha bad kyntiew ïa ka Resort katkum ki kyrdan jong ka 5-Star.
U la ong ba hadien ka jingbishar bniah ïa ka jingtyrwa, ka Kynhun Myntri ka la rai ban pynkylla ïa ki kyndon jong ka lease agreement katkum ki jingïateh kiba la pyntreikam ha kiwei pat ki projek 5-Star hotel hapoh ka jylla.
Katkum ki kyndon ba thymmai, ka kompani kan hap ban siew 5 klur tyngka kum ka security deposit shisien siew, nalor ba kan hap ruh ban siew 4 persen na ka jingïoh lum baroh (gross turnover) sha ka Meghalaya Tourism Development Corporation (MTDC).
U Myntri Rangbah u la ong ba kine ki kyndon kin long shi bynta jong ka jingïateh soskular ba thymmai, bad tang hadien ba ka kompani ka pdiang ïa ki, yn sa ai ïa ka jingbit ba pura ban kyntiew ïa ka Orchid Resort sha ka kyrdan 5-Star.
U Conrad u la pynpaw ba ka jingkyntiew ïa kane ka Resort kan pynkhlaiñ ïa ka kam jngohkai pyrthei ha Meghalaya, kan kyntiew ïa ka kyrdan jong ki jingtei paidbah ha ka jylla bad kan khring shuh shuh ïa ki nongwan jngohkai bad ki nongbei tyngka na ka ri bad na shabar ri.
