Ïoh ka jylla ïa ka karkhana shna Shynrai Lakadong ba 187 klur, da ka jaka ba 3.97 akar yn thied ha Thad Muthlong

Shillong, Naitung 09 : Ka Kynhun Myntri ha ka jingïalang kaba long ha kane ka sngi Balang ka la ai ka jingmynjur ban thied 3.972 acre ka jaka ha Thad Muthlong, Laskein Block, West Jaiñtia Hills, na ka bynta ban tei ïa ka Integrated Lakadong Turmeric Processing Plant, kaba ka jinglut baroh ka kot haduh 187 klur tyngka.
Haba pyntip ïa kane hadien ka jingïalang jong ka Kynhun Myntri ha ka sngi Balang, u Myntri Rangbah ka jylla, u Conrad K. Sangma, u la ong ba ïa kane ka projek yn pyntreikam hapoh ka prokram jong ka Sorkar Pdeng, kaba la bthah ïa man la ka jylla ha ka thaiñ Shatei Lam Mihngi ban jied ïa kawei ka mar-rep kaba kyrpang ban kyntiew.
U la ong ba hadien ka jingïasyllok bad ka Ministry of Development of North Eastern Region (DoNER), la jied ïa u Lakadong turmeric (shynrang Lakadong) kum ka mar rep kaba Meghalaya kan pynleit jingmut ban kyntiew namar ka jingdawa kaba jur jong u ha baroh kawei ka ïew ha ka pyrthei.
Katkum ka jingïathuh jong u Myntri Rangbah, ka jinglut jong ka projek ka long 187 klur, hynrei ka bynta kaba bun tam yn mang da ka Ministry of DoNER bad ka Union Ministry of Agriculture, katba ka sorkar jylla kan noh synniang kumba 30 haduh 35 klur.
Ban pyntyllun ïa ka projek, ka Kynhun Myntri ka la mynjur ban thied ïa ka jaka kaba heh 3.972 acre ha ka dor kaba kot 1.7 klur, ha kaba yn tei ïa kane ka processing plant.
U Myntri Rangbah u la ong ba ka jingtei ïa kane ka plant kan long ka sienjam kaba kongsan ban kyntiew ïa ka jingpynwandur bad ka jingpyniaid ïew ïa u shynrai Lakadong ba long uwei na ki mar rep ba pawnam jong ka jylla.
U la ong ba ka jylla ka ïohi ïa ka lad kaba heh ban pynkiew ïa ka ïoh ka kot jong ki nongrep lyngba ka jingpynbha ïa ka rukom pynmih bad ka jingai dor ïa u Lakadong turmeric.
Shuh shuh, u Myntri Rangbah u la ong ba kane ka projek ka long ruh ka jingbteng ïa ka Lakadong Turmeric Mission kaba ka sorkar jylla ka la sdang naduh hynriew snem mynshwa bad ka ïahap ruh bad ka thong jong ka Sorkar Pdeng ban kyntiew ïa ki mar rep kiba kyrpang jong ki jylla ha ka thaiñ Shatei Lam Mihngi.