Halor ka FCRA, sa kawei ka jingïalang pynbeit biang u Amit Shah bad ki Nongïalam Balang : Conrad

Shillong, Naitung 09 : U Myntri Kampohiing ka Sorkar Pdeng u Amit Shah u la kular ban bishar bniah ïa ki jingsngewkhia ba la pynpaw da ki nongïalam niam na Meghalaya bad ka thaiñ Shatei Lam Mihngi halor ki jingpynkylla ïa ka Foreign Contribution (Regulation) Act (FCRA), la ïathuh u Myntri Rangbah ka jylla, u Conrad K. Sangma.
Haba pyntip ïa kane hadien ba la wanphai na nongbah Delhi, u Conrad u la ong ba ha ka jingleit jong u sha New Delhi, u la ïalam ïa ka kynhun kaba kynthup ïa ki nongïalam na ki Balang bad ki kynhun niam bapher bapher jong ka Meghalaya bad ki jylla ka thaiñ Shatei Lam Mihngi ban ïakynduh ïa u Amit Shah.
“Ha kane ka jingïalang la ïakren sani bha halor ki jingpynkylla ïa ka FCRA, ha kaba ki nongïalam Balang ki la pynpaw ïa ki jingsngewkhia jong ki,” u la ong. Shuh shuh u la ïathuh ba na ka liang u Amit Shah u la batai ruh ïa ka nongrim bad ki jingthmu jong ka Sorkar Pdeng halor kane ka aiñ.
Katkum ka jingïathuh jong u Myntri Rangbah, u Myntri Kampohiing ka Ri u la kular ban bishar bniah ïa baroh ki mat ba la wanrah da ka kynhun bad ban ai ïa ka jubab hadien ba la dep ka jingbishar.
La ïathuh ba u Amit Shah u la mynjur ban pynlong sa kawei ka jingïalang kaba kham paka hapoh ki ar taïew ban wan, ha kaba u Home Secretary ka Sorkar Pdeng un ïakynduh bad ki nongïalam Balang na ka thaiñ Shatei Lam Mihngi ban sngap ïa ki jingsngewkhia jong ki, ban jubab ïa ki jingkylli bad ban batai shai ïa ki jingpynkylla ba la tyrwa hapoh ka FCRA.
U Myntri Rangbah u la ong ba kane ka jingïalang kaba bud ka dei hadien ba u la ai jingmut ba ka long kaba donkam ban don sa ka jingïakren kaba kham bniah bad ki ophisar ba hakhlieh jong ka Ministry of Home Affairs khnang ba ki Nongïalam Niam kin ïoh ka jingshai halor ki jingpynkylla ba la tyrwa.
La ïathuh ba ba ka jylla mynta ka dang ap ïa ka jingkhot jingïalang biang bad la khmih lynti ba ka jingïalang kaban bud kan long hapoh 10 haduh 14 sngi.
“Kumta, ïa kane ka bynta la lah ban leh hadien ka jingkyrpad na ka liang jongnga bad kumta ban ïoh jingshai shuh shuh na ka liang u Home Secretary un don ïa kane ka jingïakren kaba kham sani shuh shuh la kumno kumno hapoh ki 10 bad 14 sngi,” bynrap biang u Myntri Rangbah.