Nongpoh, Jylliew, 27: Katkum ka kyrwoh ba la phah da u Bah Donroy Kshiar, President ka Hynñiewtrep Achik National Movement (HANM), Ri Bhoi District lem bad kiwei ki dkhot nongïalam ki la pyntip paidbah ba ki la iehnoh kam bad ki la pynkut noh ban long kum ki nongïalam ka HANM ha Ri Bhoi District.
Ha katei ka kyrwoh, naduh u Bah Donroy Kshiar kum u President bad u Bah Honly N. Mabaniang, Organizing Secretary lem bad kiwei ki dkhot ki la phah da ka shithi iehnoh kam ba la phah sha u President ba rangbah ka HANM u Bah Lamphrang Kharbani ha kaba ki la pynpaw ba ki la iehnoh kam noh na ka seng HANM ha Ri Bhoi bad ruh ba kim dei shuh ki nongïalam ne ki dkhot jong kane ka seng.
Shuh shuh, ha katei ka shithi iehnoh kam ba ki la phah sha u President ba rangbah ka seng, ki la pynpaw ruh ba kim don kano kano ka daw ba ki ïa pyrshah ïa ka seng bad ka jingiehnoh kam noh na kane ka seng ka dei na ka daw ba ki la kwah ban shongthaid noh na ka seng.
Ki la ai ruh ka jingkitbok kitrwiang ïa kane ka seng ba kan dang bteng ka jingshakri na ka bynta ka imlang ka sahlang bad ki kyrmen skhem ruh ba kane ka seng kan dang kiew shaphrang khamtam ban shakri ïa ki paroh ki parasnam kum kata ka seng kaba ieng ban shakri na ka bynta ka ri bad ka jaid bynriew.
