Ïaroh ka HITO ïa ka hukum ka High Court, u CS um dei ban ngeit ïa ki ‘lei san snem

U Symbud Myntri Rangbah u don aiu ban jubab?

0

Shillong, Risaw, 19: Ka Hynñiewtrep Integrated Territorial Organisation (HITO) ha ka sngi Balang ka la ai jingïaroh ïa ka Iingbishar Meghalaya High Court kaba la pynmih da ka hukum kaba bthah ïa u Chief Secretary ka Jylla u Bah Donald P. Wahlang bad ïa u Director General of Police (DGP) u Dr. LR Bishnoi ban ym pyndem hakhmat ki lei san snem haba khynra ïa ka jingkit beaiñ ïa u dewiong na kane ka jylla Meghalaya.
Ka Iingbishar Meghalaya High Court ha ka hukum kaba tyngeh ïa u Chief Secretary ka Jylla u Bah Donald P. Wahlang bad ïa u Director General of Police (DGP) u Dr. LR Bishnoi ba kim dei satia ban pyndem ne kohnguh ha kino kino ki bor synshar, hynrei ki dei ban kem beit naphang ïa ki trok kiba kit be-aiñ ïa u dewiong.
“Nga ngeit skhem ba u Chief Secretary un pyni ïa ka bor bad nga kyntu ba um dei ban ym ngeit ïa ki lei san snem namarba sa tang katto kane por ka la poi ka Model Code of Conduct. Nga kyntu ïa ki ophisar Pulit ba kin pyni ïa ka bor ba ki don bad ban pyni ba ka aiñ ka im shisha hapoh ka jylla jong ngi,” ong u President ka HITO u Bah Donbok Dkhar ha ka jingïakren bad ki lad pathai khubor.
“Ngin sa leit ïakynduh ban tyrwa lada ki (Pulit) ki donkam ban ïarap na ka liang ka seng ka kwah ban tehlakam ïa ka jingkhaii be-aiñ ïa u dewiong ha kane ka jylla,” u la ong.
Haba kynthoh ïa ka jingtap eitmiaw jong u Symbud Myntri Rangbah ba kam don satia ka jingshalan be-aiñ ïa u dewiong, u Bah Dkhjar u la ong, “ngi buh ka jingkylli ïa u Symbud Myntri Rangbah hato u don aiu ban ai jubab haba manla ka por u kren sha ki lad pathai khubor ba ym don ka jingkhaii be-ain ïa u dewiong bad ba dei ban da pynshisha shwa. Hynrei kane ka jingpynmih hukum jong ka Ingbishar ka pynpaw shai ba u Bah Prestone uba ju saitkhuid manla ka por ba kam don ka High Level, kam don ka jingkhaii tuh ïa u dewiong ban kit lyngba ki trok.
“Ngi burom ïa ka hukum jong ka High Court bad kaba pynpaw shai ba ka don ka jingkit tuh ïa u deiwong bad ka jingdon ki High Level,” la ong u Bah Dkhar.
U la pynkynmaw ruh ba dang shen ki dkhot ka Seng ki la ïoh bat haduh 30 tylli ki trok kiba kit be-aiñ ïa u dewiong ha kaba la register case bad don mynta ha kti jong ka ingbishar. “Ïa kane ruh u (Bah Prestone) dang sait khuid hana ba ladep ai Challan bad kito ki kali kiba ngi ïoh bat kim don ïa ka Challan bad na kata ka daw la phah sha Court,” u la bynrap.
“U ju ong ba ngi dei tang ki khynnah rit, hynrei mynta ka paw ba ki khynnah rit ruh ki don ka la jong ka nongirm bad ka High Court ruh ka la pynksan ba ka don ka High level bad pynmih da ka hukum ban kem naphang ïa ki trok kiba kit be-ain ïa u dewiong,” la kynthoh une u nongïalam ka HITO.
Haba pynpaw ba ki paidbah kim don jingshahniah ïa ka rukom synshar ka Sorkar MDA, u Bah Dkhar u la ong, ‘lada ngi peit ïa ki rukom treikam ngi duh jingshahniah bha la ka long na ka tnat Pulit bad na ki bor synshar district bad na ka liang jong ka Sorkar lei ynnai ïakren. Ka don ka jingïatreilang hapdeng u Pulit bad ki bor synshar District ba lait u deiwong.”
“Nga kynmaw ba u Myntri Rangbah ka Jylla u ong ba la pyrkhing bha hynrei lada pyrkhing bha kumno da ki spah tylli ki trok kit dewiong kin lait shi miet. Kam dei shuh kaba pyrkhing hynrei kaba pynsynjor. Ngi, ngi ïohi ha kata ka rukom,” u la kynthoh.
“Mynta lada phiel ka rukom treikam ban kem ïa ki kali kit dewiong be-aiñ, ka HITO kan don ha syndah jong ki Pulit bad lada duna briew ngin ai ïa ka jingïatreilang bad ki Pulit bad lada kim lah ban kem ka HITO kan mih sha madan ban bat hi dalade ïa ki kali kiba kit dewiong be-aiñ,” ong shuh shuh u Bah Dkhar.
U la kyntu ïa ka seng ki nongkhaii dewiong bad ïa ki briew kiba im ja na kaba tih bad shalan ïa u dewiong ba kin mih sha surok ban dawa ïa ka Sorkar ba kan pyllait noh ïa ka Challan khnang ba ka Sorkar kan dup ïoh lum ïa ka khajna bad ba ki briew kiba im ja na ka kam deiwong kin ïoh jingmyntoi.
“Lada ka Sorkar kam lah ban shna ïa ka aiñ ha kaba ïadei bad ka jingtih deiwong, phi kiba im kamai jakpoh da kane ka kam dewiong phi dei ban mih noh shakhmat ban dawa ïa la ka hok,” u la ong.
U la ïathuh ba ka Seng ka ladep phah ïa ka dorkhas sha ka Sorkar halor ka jingsahteng ka rai (resolution) ba la mynjur da ka Ingdorbar Thawaiñ ka Jylla Meghalaya halor ka jingpynbeit thymmai ïa ka Forest Act, 1980 bad ïa ka aiñ ka aiñ marpohkhyndew Coal Mines (Nationalisation) Act, 1973 kaba mut ba baroh ki krem dewiong ki dei ki jong ka Sorkar India. “Lai tylli ki resolution ladep phah hynrei haduh mynta ym lah ban weng ïa kane ka Coal Mines (Nationalisation) Act, 1973 . Ngi sngew ba ki paidbah ki dei ban tip shai ba ladei ban pyntreikam noh ïa ka Instrument of Accession,” ula bynrap.
“Ka MMDR Act ruh ka hap ha ka Coal Mines (Nationalisation) Act, 1973. Lada ka khyndew ka shyiap ka dei ka jong phi, tangba phi hap ban shim wai (lease) na ka Sorkar,” u la ong.
“Kine ki 60 ngut ki Nongmihkhmat kiba la dep mynjur ïa ka resolution ha u snem 2016, 2017 bad 2018 lada ki ieid shisha ïa ka ri ki dei ban resain noh mardor khnang ba ka Sorkar kan wanrah ïa ka jingpynbeit thymmai ïa ka Coal Mines (Nationalisation) Act, 1973,” u la ong.
U la kyntu ruh ïa u MLA jong ka North Shillong Constituency u Bah Adelbert Nongrum ba u dei ban mih shakhmat ban kren eiei halor kane ka mat.

Leave A Reply

Your email address will not be published.