Shillong, Jymmang 16 : U Secretary ka Ministry of DoNER u Sanjay Jaju, ula ong ba ka Meghalaya ka dei ka Jylla kaba kiew sted eh hapoh ka Ri haba phai sha ka ïoh ka kot bad ka roi ka par haba kular ïa ka jingkyrshan kaba khlem sangeh na ka Sorkar Pdeng ban pyntyllun shakhmat ïa ka Jylla.
U Jaju ula pynpaw ïa kane ha ka jingïalang ba lyngkot (Curtain Raiser) ba la long ha Meghalaya House, New Delhi, kum ka jingpynkhreh ïa ka North East India Infrastructure Summit & Exhibition (NEEINFRA) 2026, ka ban sa long ha Shillong ha ka 11 bad 12 tarik u bnai Jylliew 2026.
“Ka Meghalaya ka dei ka Jylla kaba kiew sted eh hapoh ka Ri, da ka jingkiew kaba kot haduh 13-14% bad kumjuh ruh ka ïoh ka kot kaba kiew haduh arshah hapoh ka san snem ba la leit” ong u Sanjay Jaju haba ai jingïaroh ïa ka jinglong nongïalam jong u Myntri Rangbah ka Jylla u Conrad K Sangma.
Haba shim ïa ka thaiñ Shatei Lam Mihngi kum ka “Ashtalakshmi”, u Jaju ula ong ba ka thaiñ ka don hapdeng eh jong ka thong ka Ri ha ka liang ka roi ka par bad ong “Ka Meghalaya bad ka Shillong kin dei ki jaka ki ban dang kiew ha ka liang ka jingdon ïa ki jingtei, ka jingbei tyngka ban seng kam karkhana, ka kam jngohkai bad ka sengkam sengjam”.
Ha kane ka jingïalang la ïadon lang u Myntri Rangbah ka Jylla Conrad K Sangma kum u kongsan, u Avinash Joshi, IAS, Secretary ka Ministry of Food Processing Industries, ka Sorkar India, u Sanjay Goyal, IAS, Commissioner & Secretary ka Sorkar Meghalaya bad Chair, Organishing Committee, NEIINFRA, u Bajrang Lohia, President ka FINER nalor kiwei kiwei.
Kane ka summit, kaba la buh ban long ha Shillong ha ka 11 bad 12 tarik Jylliew, 2026, kan wanrah lang shi jaka ïa san ngut ki Myntri ka Sorkar Pdeng, ki Myntri Rangbah na baroh ki Jylla ka thaiñ Shatei Lam Mihngi, ki nongthaw policy, ki nongseng kam, ki nongpyntrei ïa ki jingtei, ki Bank bad ki nongïalam jong ki kompani ban ïakren halor ki lad pynïasoh, ka jingbei tyngka bad ka jingkiew shaphrang jong ka thaiñ.
Haba kren ha ka jingïalang, u Conrad K Sangma, Myntri Rangbah ba don burom ka Meghalaya, ula ong ba ka ïoh ka kot jong ka Meghalaya ka la kiew arshah ha kine ki san snem ba la leit noh, katba ka jingkynshew pisa kala kiew “saw shah haba nujor ïa kaei kaba long naduh u snem 2018”.
Haba khot ïa ka Meghalaya “kum kawei na kiba kiew sted bha ha ka ïoh ka kot hapoh ka Ri”, ula ban jur ba ka Jylla ka la “ïai bteng ban kiew ha kajuh ka jingsted ha kine ki lai haduh saw snem bala leit” ïa kaba u ong, ka long kaba donkam na ka bynta ka jingshaniah jong ki nongkynshew kam.
Ha kaba kren halor ka Meghalaya Industrial Promotion Policy, u Conrad u la ong ba ka Jylla ka la pynmih ïa shibun ki jingmyntoi” na ka bynta ki nongseng kam. Ula ban jur ruh ïa ka rukom treikam kaba khlaiñ ha ka liang ka seng kam seng jam ka Jylla, haba pynpaw ba ka jaka ka la ïai bteng ban ïoh ïa ka jingithuh halor ka jingdon ïa ka “rukom treikam kaba biang palat na ka bynta ki nongsengkam hapdeng ki Jylla kiba rit”.
U Myntri Rangbah u la kren ruh shaphang ka rukom treikam ban pynïar ïa ka lyngkha treikam ha ka IT ha Jylla, haba pynpaw ba ka IT park ba nyngkong ka Jylla ka dei kaba la “dap sman” katba ka IT park ba-ar ka ban dang wan, ka la sakhi ïa ka jingkwah ban don bynta jong ki kompani kiba dei napoh ka Ri bad nabar ri ruh kumjuh.
Ula ong ba ka Meghalaya mynta ka la ïaid shaphrang ban nang pynïar, da ka jingthmu ban tei shuh shuh ïa ki jingtei jong ka IT ki ban plie kham bun ki lad ïa ki samla.
Kiwei pat kiba la ai jingkren ki long u Avinash Joshi, IAS, Secretary, Ministry of Food Processing Industries , ka Sorkar India, u Sanjay Goyal, IAS, Commissioner & Secretary, ka Sorkar Meghalaya bad Chair, Organising Committee, NEIINFRA, bad u Bajrang Lohia, President, FINER.
