Ïalap paidbah u Bah Ardent Basaïawmoit ha Khliehriat halor ka synshar khadar kaba khuid

Khliehriat, Naitung 22: U President jong ka Voice of the People Party, u Bah Ardent.M.Basaïawmot lem bad u General Secretary ka VPP, u Dr Ricky.AJ.Syngkon, mynta ka sngi ki la wan ban pynshai paidbah halor ka synshar khadar kaba khuid ba suba, ïa ka jingïalang la khot pynlong da ka VPP Khliehriat Circle ha Khliehriat West Community Hall.
Haba kren ha ka jingïalang, u Bah Ardent Basaïawmoit, u la ong ba kum ka jaitbynriew dei ban long kawei shi tylli, khynriam u pnar, u bhoi, u war, ym dei ban ailad ïa kano kano ka jingmut ne jingpyrkhat ka ban wanrah ïa ka jingïa pait ïa pra.
U la pynshai ïa ki nongrim ba ka party ka ieng ban wanrah ïa ka jingkylla dur ha ka synshar ka khadar hapoh ka jylla, ban pynduh pyndam ïa ka jingbam sap, u la kren ruh ïa ka jinglong jingman ka politick ha ri lum Jaiñtia bad ong ba ka politik ha Jaiñtia ka ïapher na kiwei pat ki jaka, namar hangne ka don ka jingïa byrngem briew, ka jingleh jubor u la ong ba kane ka dei kaba sniew bad ai nguh ïa u Blei ba u la sei ïa ka VPP ha kaba ka party VPP hi ka pynrem ïa kaba kum kane ka politic, u la ong ruh ba ka long kaba donkam ban tip kumno ban jied ïa ki nongmihkhmat.
U la ong ruh ba ka VPP ka pynrem jur ïa ki kam bansap, namar dei na ki kam bamsap kaba pynlong ïa ka jylla ban hiar ar sut, kumjuh ruh ka jingpeit shiliang khmat ïa ki samla wad kam wad jam, u la ong ruh ba ka ka sorkar kaba khuid ka dei ban warah ïa ki lad sumar ba biang, ki skul, ki college ban kyntiew ïa ka jingnang jingstad, ka dei ban kyntiew ruh ïa ka ïoh ka kot jong u paidbah, kam dei ban pynlut phut than ïa ka pisa, hynrei ka dei ban pynkhlaiñ ïa ka pla tyngka jong ka sorkar, haba kren shaphang ka synshar khadar u la kynthoh ruh ba ka sorkar ym dei tang ka bam sap, hynrei la ïohi ruh ba ka la don ka jingpyrshang wat ban bam duh ïa ka hok jong ki paidbah, haba kren shaphang ka mariang u la ong ruh ba ka VPP ka kwah ruh ban ki kam kiba trei kim dei ban pynsniew ïa ka mariang.
U President jong ka VPP Khliehriat Circle, u Bah Damewanhi Rymbai, u la ong “Ngi ïohi ba ka la dei ka por ban pynrung kyrteng noh sha ka party na ka bynta kito kiba kwah ban pynïasoh bad ka VPP, hooid kiwei kiwei ki pary kim ju patiaw ban trei, ki shu pyndonkam tang da ka pisa ha shwa ka ar ne lai taiew ha shwa ka election”
U Bah Dame, u la ong ruh ba ka VPP ka buh thong ban pynïair bad pynkhlaiñ ïa ka party sha baroh sha ki jaka wat sha ki jaka ba kyndong ruh, u la ïathuh ruh ba kumba long mynta te ym long ïakren namar tang shu ïakren ïa ka kam hima sima lah shah peit poh bad shah kren ba ka VPP kan nym lah ban thaw pyrthei namar kam pyndonkam pisa “Kiba bun ki dkhot ki sngew duh mynsiem, namar ha East Jaiñtia Hills ka jingmut jingpyrkhat jong ki paidbah ka distict ka mut beit ba tang shu rung sha ka paty ka long ban ïoh jingmyntoi, hynrei ka jingthmu jong ngi pat ka long ba kiba rung sha kane ka party ka long ban wanrah ïa ka bha ka miat ban wanrah ïa ka jingkylla, ym ban ïohnong shimet bad ngin nym ailad ïa kino kino ki briew ki ban rung sha ka party ki ban shim kabu na ka bynta ban myntoi shimet, hynrei ngin pyrshang ban hikai bad ban pynshai ba ki dei ban don ka jingkitkhlieh ban kyntiew ïa ka imlang ka sahlang, don ruh kiba pyrkhat ba lada pynïasoh bad ka VPP ka long kaba eh namar ba ngim don eiei ban ai, ngin trei shitom, ngin khapbrip ki khmat, ngin set ïa ki shkor haba wan ki jingkren pynrem, ki jingkren pynduh mynsiem” ong u Bah Dame.
Ha kane ka sngi la ïoh ruh ban pynrung kyrteng ïa ki briew kiba na East Jaiñtia Hills District, kiba kwah ban pynïasoh bad ka party VPP.