Beh ka PAMRA ïa ki Meitei na Mizoram, rai ka Sorkar Manipur ban leit shaw da ka liengsuiñ

Imphal, Naitung, 22: Ka Sorkar Manipur ka la rai ban kit da ka liengsuiñ ïa ki jaidbynriew Meitei na ka Jylla Mizoram naduh ka sngi u Blei.
Kane ka rai ka long hadien ba ki jaidbynriew Meitei ki la shah byrngem ha ka kynhun kieng atiar PAMRA na ka jylla Mizoram hadien ba ka video ka la saphriang halor ka jingshah pynïaid lyngkhuit arngut ki kynthei Kuki hakhmat ki paidbhur Meiti.
Ki Pulit ka Manipur tang shu paw pyrthei kane ka jingjia, ki la kem shwa ïa saw ngut kiba donkti bad mynta ka sngi ki la ïohkem sa ïa uwei uba la paw dur ha ka video kaba la saphriang ha ka 19 tarik mynta u bnai.
Ïa ki san ngut kiba la shah kem, ki Pulit ki la ïoh ban set along 11 sngi na ka bynta ban pynlong ïa ka jingtohkit katba ka ing jong uwei napdeng kiba donkti ka la shah wiang ding bad shah pynjulor ha ki paidbah kiba dap da ka jingbitar.
Ïa ki liengsuiñ ba kyrpang ba la pynbiang ban kit ïa ki jaidbynriew Meitei kiba pule bad kiba trei ha Mizoram, kin long na Aizawl sha Imphal; na Aizawl sha Silchar, Assam, ka tyllong khubor.
Ki bor pynïaid ïa ki liengsuiñ kiba mih na Lengpui, Mizoram, ki la ïathuh ba ki don kumba 60 ngut ki Meitei kiba la leit phai sha Imphal bad don ruh kiba la mih noh na Mizoram da ki Bos bad ki Taksi.
Ki dkhot barim jong ka kynhun kieng atiar Mizo National Front (MNF) ki la kyrpad ïa ki jaidbynriew Meitei na ka Jylla Manipur kiba sah ha Mizoram ba kin mih noh na ka jylla na ka bynta ka jingshngaiñ jong ki namarba ka jinglong jingman ka la nang sniewdur hadien ka jingïaumsnam kaba la jia na ka jingïakynad jaidbynriew ha ka Jylla Manipur.
Ha u kyrwoh ba la pynmih na nongbah Aizawl ha ka sngi Thohdieng, ka Peace Accord MNF Returnees’ Association (PAMRA) ka la ong ba ka jinglong jingman ka la nang sniewdur bad kam long shuh kaba shngaiñ ïa ki jaidbynriew Meitei ba kin dang sah ha Mizoram na ka daw ki kam riewkhlaw ba la leh da ki runar ha ka jylla Manipur.
“Haba ïadei bad ka jingjia, kano kano ka jingjia kaba sniew ka lah ban jia ïa ki jaidbynriew Meitei ha kum kane ka khep, ka PAMRA ka kyrpad ïa ki paid Meitei kiba don ha Mizram ba kin leit phai noh sha la ka jong ka jylla khnang ban lait na kino kino ki jingjia kiba sngewsih,” ong u kyrwoh.
Ki samla Mizo ki la dap da ka jingbitar ïa ki kam riewkhlaw bad ki kam bymman ba la leh da ki Meitei pyrshah ïa ki jaidynriew Zo lane Kuki ha ka Jylla Manipur.
Ka Association ka la ong ba ki (Meitei) kan ym shim ïa kano kano ka jingkitkhlieh lada mih kino kino ki jingjia lada kim (Meitei) pynsngap ïa ka jingkyrpad bad lada kim mih noh na ka bynta ka jingshngaiñ ka jong hi.