26 tarik, Nailar, yn leit sorjamin ki dkhot ka Regional Committee ïa ka Deshdomrea

Shillong, Naitung, 22: Ki ar tylli ki Regional Committee jong ka jylla Meghalaya bad Assam kiba la ïakynduh lang ha ka Saitjaiñ ki la rai ban ïakren pynbeit shwa tang ïa ki lai tylli ki jaka kiba don ha ka jingïakajia pud hapdeng ka Jylla Meghalaya bad ka Jylla Assam. Kine ki lai tylli ki jaka ki kynthup ïa ka Deshdomrea, Nongwah-Mawtamur bad Borduar. Katba ïa ka Block-II, kine ki ar tylli ki Committee ki la rai ban ïakren pynbeit kham hadien namarba ka dei ka jaka kaba kham kyllaiñ bad kaba kham jwat.
Ha ka jingïalang kaba la long ha Assam State Guest House, Koinadhara, Khanapara, na ka jylla Meghalaya ba la khlieh da u Symbud Myntri Rangbah ka jylla Bah Prestone Tynsong kum u Chairman la synran lang da ki MLA ka Ri-Bhoi ba kynthup ïa u MLA jong ka Jirang Constituency u Bah Sosthenes Sohtun, u MLA jong ka Mawhati Constituency u Bah Charles Marngar, u MLA jong ka Umroi Constituency u Bah Damanbait Lamare, u Chief Executive Member (CEM) jong ka Khasi Hills Autonomous District Council (KHADC) Bah Pynïaid Sing Syiem, kynthup ruh u Deputy Commissioner jong ka Ri-Bhoi District u Arpit Upadhyay bad ki ophisar katba ïa ka Regional Committee na ka jylla Assam la lamkhmat da u Chairman u Atul Borah bad u Chandra Mohan Patowary kiba dei ruh ki Myntri jong ka Sorkar Assam ryngkat ka jingdonlang jong ki ophisar.
Ka jingïalang jong kane kine ki ar tylli ki Komiti ka la rai ban ïakren shuwa ïa ka Desh Domreah, ka Nongwah Mawtamur bad ka Borduar, katba ïa ka Block-II yn sa ïakren kham hadien.
U Chairman jong ka Regional Committee u Bah Prestone Tynsong, ha ka jingïakren bad ki lad pathai khubor u la ong, ‘ngi la rai ban shong jingïalang biang ha ka 25 tarik, Nailar, ban bteng ïa ka jingïakren bad ban leit jurip ruh ïa ka desh Domreah ha ka 26 tarik, Nailar ban tip ïa ka jinglong jingman jong ka jaka.”
“Nangne shakhmat ngin sa nang ïakynduh shuh shuh ban ïa pynbeit ïa ka jingleit sorjamin ïa ka Nongwah Mawtamur, ka Borduar bad ka Block-II,” u la ong.
“Ha kaba ïadei bad ka Block-II u Chairman jong ka Regional Committee na ka Jylla Assam u dei u Pijush Hazarika bad ngin sa ïakynduh ha ka jingïalang bad u ban ïakren pynbeit na ka bynta ka Block-II,” ong u Bah Prestone.
Haba kylli, ula ong, “ha kum kine ki kam kiba la sahteng da ki phew snem, la 50 snem tam, ban ong hun ruh kam long, ban ong nym hun ruh ym dei. Ngin hap ban shim ïa kaba bha tam bad ngi hap ban sngewthuh lada ngim shim ïa ka rai ngin ym lah ban pynkut noh ïa kane ka ishu namarba na uwei u snem sha uwei pat u snem ka nang mih shi nang mih bad ka nang sniew shi nang sniew.”
“Ngi la bthah ïa ka District Council lyngba u CEM bad ïa u Dy. CM uba peit ïa ka tnat Elaka ba kin pyntip lypa ïa ki Rangbah Shnong, ki Syiem bad ïa ki Sordar ba kin dup leh la ka jong ka kamram khnang ba ngin da la leit jurip lang (na ka Regional Committee jong ka Jylla Meghalaya bad Assam) ba kan ïaid beit ïaid ryntih ka kam ka jam,” la ïathuh u Bah Prestone.