Nongpoh, Nohprah 01: U Myntri ka sorkar pdeng, ba dei peit ïa ka tnad Commerce and Industry u Som Parkash mynta ka sngi u la wan ban iuh kjat ha Ri Bhoi na ka bynta ban ïa kynduh ïa ki ophisar sorkar ban wad jingtip halor ki kam pynroi ba la pyntreikam ha kane ka District kaba la iohnam ruh kum ka ‘Aspirational District’.
U Som Parkash mynta ka sngi u la leit ban jurip ïa ka Civil Hospital Nongpoh ban peit bad khmih ïaka jingbit jingbiang jong katei ka jaka sumar bad hadien kata u la pynlong ïa ka jingïakynduh lang bad ki ophisar sorkar ha Conference Hall ka ophis u Deputy Commissioner ka Ri Bhoi halor ka jingpyntreikam ïaki skhim sorkar ha kane ka district kaba la iohnam kum Aspirational District haka jylla. Ha kane ka jingïakynduh lang la shim bynta ruh da ki ophisar sorkar na ki tnad treikam bapher bapher ka Ri Bhoi bad kynthup ruh ki ophisar kiba synran ïa u Myntri ka sorkar pdeng, ha kaba ïa kane ka jingïakynduh lang u Deputy Commissioner ka Ri Bhoi, u Arpit Upadhay, u la ai ka jingpynshai halor shibun ki kam pynroi kiba ki la leh lyngba kita ki song pynroi kum ka Aspirational District naduh ka koit ka khiah, ka rep ka riang, ki kam pynroi sha ki thaiñ nongkyndong bad kiwei kiwei.
Na ka liang u Som Parkash haba kren ha katei ka sngi u la pynpaw ka jingsngewkmen ban ioh ban ïa kynduh ïa ki ophisar ka Ri Bhoi, ha kaba kum ka Aspirational District ki la trei ryngkat ban kyntiew ïa kane ka District ha ka liang roi ka par bad kyntu ruh ïaki ophisar ba kin dang trei shitom naka bynta ban pyntreikam ïaki skhim bapher bapher.
