Ai jingkyrshan ka HITO-NC ïa ka jingdawa ka DS Umkiang ban maramot ïa ka surok NH

Khliehriat nohprah 01: Ka Hynñiewtrep Integrated Territorial Organisation Narpuh Circle, ka ai ka jingkyrshan ba pura ïa ka Dorbar Shnong Umkiang kaba la dawa na ka NHAI ba dei ban maramot noh mardor ïa ka surok national highway ha ka thaiñ kaba la sniew bad jot rathai bad halor kane ka Dorbar Shnong ka la ai por shi taïew ba ka dei ban maramot.
U Vice President jong ka HITO Narpuh Circle, u samla Hamjan Siangshai, u la pynpaw ba ka jingdawa ka Dorbar Shnong Umkiang ka dei kaba shongnia kumta ka seng ruh ka kloi ban ai lem ïa ka jingkyrshan “Ngi la sakhi ruh ba ka jingjot jingjulor ka surok national highway ha Umkiang bad ha ka thaiñ Narpuh ka la long shaba palat ha kaba ka jinglong jingman ka surok ka la buh jingma ïa ki ba leit ba wan bad wanrah jingeh ruh namar ka jingdheng kali kaba ju jia khah khah ha ka thaiñ” pynpaw utei u nongïalam ka HITO Narpuh Circle.
Kum ban shu phai dien, la ong ruh ba na ka liang ka Dorbar Shnong Umkiang ka la dep ban pyntip sha u Deputy Commissioner ka East Jaiñtia Hills District bad kumjuh ruh sha ka NHAI bad buh ruh ka jingkyntu ban maramot noh kloi ïa ka surok, hynrei ym shym la shim khia satia ïa kane ka jingkyrpad ka Dorbar Shnong bad ka NHAI ka khlem leh satia kumba ka la kular bad mynta ka Dorbar Shnong kan dang ap kumba la ai por shi taïew bad lada ym lah ban maramot, ka shnong kan pynlong da ka jingiakhi da kaba ïa mih paidbah ha surok ha ka 3 tarik u nohprah.
“Kumba long mynta ka jingbym maramot ïa kane ka surok kaba pyniasoh ruh bad ka jylla Assam (Barak Valley), Manipur,Mizoram, Tripura bad kiwei kiwei ki jylla ka la wanrah jingeh haduh katta katta ïa ki paidbah nongleit nongwan bad buh jingma ruh ïa ka koit ka khiah jong ki paidbah khamtam ki khynnah ki khyllung, na ka daw ka jingjur palat u pum pum khyndew” la pynpaw ki nongialam shnong Umkiang.