Ïakynduh lang ka Wrestling Association of Meghalaya halor ka North East Olympic Games 2022

0

Shillong, Nailar 24 : Ka General Meeting ka Wrestling Association of Meghalaya ka la ïa kynduh ha ophis treikam ha Demthring, Shillong ban ïakren halor ka North East Olympic Games 2022 ka ban long naduh 30 tarik Risaw ka 6 tarik Naiwieng 2022 ha nongbah Shillong.
Ïa ka jingïalang ba la pynïaid da u Bah John F Kharshiing President ka Wrestling Association of Meghalaya ha ka jingïadonlang ki dkhot na kiwei ki district kiba la shim ïa ka rai ban pynskhem ïa ki hynñiew ngut ki nongkitkam na ka bynta ban pyndep ïa ki kot kiba donkam na ka bynta ban ïoh ïa ka jingithuh na ki bor ba pher bapher.
Kitei ki dkhot ki kynthup ïa u John F. Kharshiing (President), Bah Raldeen Bryan Shabong (Vice President), Bah Isaiah Kharmawphlang (Vice President), Bah Sunny P. Dkhar (General Secretary), Regifull Thongni (Assistant General Secretary), Rissan Well Lahong (Assistant General Secretary) bad Bah Coverfull Marngar (Treasurer) kiba la ïa rai ban pynrung ha ki kot register sorkar ïa kine ki hynñiew ngut ki dkhot kiba la jied ha kane ka sngi da ka general meeting ha kaba la rai ban sa kynthup shuh shuh kiwei pat ki dkhot ynda la dep ki kam.
Ha kane ka sngi la rai ban pynlong ïa ka jingai jinghikai bad ka jingjied nongïalehkai ha Nongbah Shillong ha u Nailur bad Risaw 2022 bad la buh ïa ka Selection Committee na ka bynta ban jied ïa ki nong ïashim bynta ha ka North East Olympic Games 2022.
Ki dkhot jong ka Selection Committee kiba la shah jied ki kynthup ïa u Bah Isaiah Kharmawphlang na East Khasi Hills District, Bah Coverfull Marngar, Ri Bhoi District, Bah Khrawpyrkhat Rashir, West Khasi Hills District, Bah Rissan Well Lahong, West Jaintia Hills District, Dipulin Marak, West Garo Hills District, kynthup lang u President bad General Secretary kin dei ki Ex-officio member jong kane ka Committee.
La rai ruh ban thoh kyrpad ia ka tnad Department of Sports and Youth Affairs ban thaw lad ban ïoh jaka ïalehkai bad kumjuh ban ïoh ïa ka Wrestling Mat kaban long kaba kongsan na ka bynta ka North East Olympic Games 2022
La rai ruh ban shim kane ka lad ban pyntip sha baroh kiba kwah ban rung lane ban ïa shimbynta kum ki nongïalehkai lympat ba kin phone sha ki nongkitkam ha la ki District lane ban phah ka jingtip sha u President +91-9436102663 ne General Secretary, +91-9366592985 jong ka Wrestling Association of Meghalaya.

Leave A Reply

Your email address will not be published.