Ïakynduh ki nongïalam ka JSM ïa u DC ka EJHD halor ka jingiakhun exam online ïa ka CUET na ka bynta ki khynnah pule
Khliehriat lber 06: Ka Jaiñtia Students Movement, hapoh ka jingïalam u President rangbah, u bah Lenningstar Rymbai bad u General Secretary, u bah Roitre Dkhar, mynta ka sngi ka la leit ban ïakynduh bad iakren bad u Deputy Commissioner ka East Jaiñtia Hills District ha kaba iadei bad ka jingiakhun exam ki khynnah pule da kaba leh online bad ka seng ka kyntu ruh ïa ki bor district ban shimkhia ïa ki mat ba ka seng ka kyrpad ban kham pynsuk ïa ki khynnah pule jong ka thaiñ.
Katkum u kyrwoh na ka seng la ong “Ngi la kyrpad ïa u Deputy Commissioner ban bthah ïa ka NIC cell hapoh DCophis ba kan ai jingiarap ïa ki samla pule ban pyndap ïa ka online application, ban bthath ruh ïa ki BDO ban buh ïa ki centre ba shipor lane temporary centre ha ki ophis Block khnang ban suk ban thep ïa ki online application jong ka CUET, shuh shuh ban bthah ïa ki common service centre ne rainbow ban ai jingiarap ïa ki samla pule ha ka por ba thep online” la ong ruh ba ha ka jing ïa kren ki nongialam jong ka JSM bad u DC, u Abhislah Baranwal, la ong ba u DC u la kular ban bthah ïa ka NIC hapoh ka ophis u dc ba kin iarap ia ki samla pule ban thep online application, bad ruh ïa ki BDO bad ki Common Service Centres ne rainbow ba kin iarap ïa ki khynnah pule ban thep online application, ha kajuh ka por ka seng ka kyntu ïa ki khynnah pule na duh ki kyrdan HSSLC ban wan sha khmat ban thep kyrteng na ka bynta ka examination CUET namar sa tang 20 sngi ka la kut ka por namar kane ka dei tang haduh ka 26 tarik u lber 2024.
La ong ruh ba ka JSM hadien ba ka la ioh jingtip ba ka tnat pule puthi jong ka jylla Meghalaya lyngba ka shithi no. EDN:69/2022/110 Dated Shillong the 20 December, 2023 ka la bthah ia ki Principal jong ki skul bad ki college bad ki Principal jong ki Higher Secondary Schools ha Meghalaya ban ai jingtip halor ka jingdonkam ban ialeh ïa ka exam Common University Examination Test (CUET) khnang ban ioh admission ha ki college kiba pyniasoh ba ka skul bah NEHU, Shuh shuh katei ka shithi ka la kdew ba kan nym don shuh ka jingpyllait ne exemption ïa ka Meghalaya na kane ka exam CUET, kumta ka seng JSM myn ha ka 16 tarik u kyllalyngkot 2024 ka la phah shithi sha u Education Minister ka Meghalaya, kumjuh ruh sha u myntri rangbah ka jylla, sha u Chief Secretary bad sha ki Deputy Commissioner jong ka East bad West Jaiñtia Hills ban pynioh ïa ki exam centre jong ka CUET ha Shillong, Tura bad jowai ne ha baroh ki district headquarters.