Lah duh ka Kharraswai FC ha ka lympung ïalehkai jong ka 1st Knock-Out FT 2024

Mawkyrwat, Lber 05: Ka Kharraswai Football Club ka la long ka nongjop hadien ba ka la pynliem noh da 4 – 2 kol pyrshah ïa ka Mawsynram Sports Club ha ka lympung ïalehkai jong ka 1st Knock-Out Football Tournament 2024 ba la pynïaid da ka HANM, Balat Border Area Circle ha madan Dangar, East Khasi Hills District.
Haba phai ha ka jingïalehkai hapdeng kitei ki ar kynhun ka la long shisha ka jingïalehkai kaba itynnad bha namar ha ka jingïakhun ka long ban rah ïa ka nam jop. Kumta ha ka jingïaleh, kaba dei ha ka kyllastep, ym shym la don mano mano ban ïoh ban ïa pynkhih jar wat kawei ruh hynrei haba wan phai pat ha ka jingïalehkai jong ka kyllamiet, ka Kharraswai FC bad Mawsynram SC ki la ïoh ban ïa khaid da kaba ïa thep mar kawei ka kol.
Namarkata, ban rai mano ba jop, na ka liang ki nongpynïaleh ki la shu pynïaleh noh da ka Tie Breaker ha kaba ha kane ka jingïaleh ka Kharraswai FC ka la long ka nongjop da kaba ka la tam noh da 4 – 2 kol pyrshah ïa ka Mawsynram SC.
Ha kaba ïa dei bad ki khusnam, na ka liang u bah H.M. Shangpliang, u nongaibuit jong ka tnad pule puthi jong ka sorkar Meghalaya bad u bah Alvin Sawkmie, MDC ka Mawsynram Constituency ki la ïoh ban sam.