Haduh 500 bad 1000 tyngka lum khajna ki pulit Assam ïa ki kali naka thaiñ Lapangap

Jowai, Lber 06: Ka Jaiñtia Student’s Movement (JSM) Lapangap Unit mynta ka sngi Balang kala leit ban ujor sha u Deputy Commissioner ka West Jaiñtia Hills District bah B.S. Sohliya halor ka jingeh jong ki nongshong shnong ka thaiñ Lapangap kaba dang hap hapoh ka Namdong C&RD Block kaba ki ïa kynduh na ka jingshah lum khajna ha ki pulit Assam haba ki ïaid lynti lyngba u surok Tahpat-Lapangap-Khanduli.
Ka seng kala pynsngew la kumba ar taïew mynta ki pulit jong ka Assam kiba wan sah naduh u snem 2023 ha ki bynta ba ïa khajia pud hapdeng ka shnong Lapangap bad Tahpat kila sdang ban khynra bad lum khajna ïa ki paidbah Pnar kiba ïaid lynti da ki kali ba don ïa ki Registration No jong ka jylla Meghalaya, katba ïa kito ki kali ki bym rah ïa ki licence bad Registration ki lum khajna haduh 500 bad 1000 tyngka.
Kane ka jingkhrong khajna jong ki pulit Assam kaba pynbitar ïa kiba bun ba lang khamtam ïa ki nongshong shnong ka Lapangap namar katei ka jaka (pynthor) ba ki khrong khajna ka dang hap hapoh u pud u sam jong ka shnong Lapangap, la ong ka seng.
Halor kane ka JSM ka buh ka jingkyntu na u Deputy Commissioner ba un shim khai mardor ïa kane ka kam, khnang ban lait na kino kino ki jingïakynad ha kine ki sngi ban wan.
Na ka liang u President katei ka Unit samla Heyboyme Myrphet hadien ka jingïakynduh bad u DC ula pyntip ba utei u khlieh duh ka District ula kular ban shimkhia ïa kane ban pynlong ka jingïakren lyngba ka Video Conference hapeng ki ar District ka West Jaiñtia bad West Karbi Anglong haka 12 bad 13 tarik mynta u bnai.
Shuh shuh ula ong kiba bun ki nongshong shnong haba ki leit sei pisa na ki Bank jong ki, hynrei kaba sngewsih ki hap pat ban siew pynban ïa katei ka pisa kum ka bai khajna jong ki pulit Assam.