Ïaid shaid shaid ki kam ban pyndep ïa ka Jingkieng Dwar-ksuid, shen yn ioh pyndonkam ki paidbah

Nongpoh, Jymmang 14: Kumba ha kine ki ar snem ba la leit noh la mih ki jingïakren halor ka jingsynjor ka Jingkieng Dwarksuid kaba la buh jingma ïa ki paidbah ha ka leit ka wan bad ruh ba wat ka bor synshar District ka la pynjari da ki kyndon aiñ ban khang pyrshah ïa ki Kali ba kit khia ban ïaid lyngba katei ka jingkieng Dwarksuid, hynrei kane ka jingeh ki paidbah shyn yn lah ban weng noh kaba dei hadien ba ka sorkar jylla lyngba ka NHAI ka la tei thymmai da kawei pat ka jingkieng ba thymmai ba ka kam ka la ïaid shaid shaid bad shen ka NHAI kan sa pyndep noh ïa kane ka Jingkieng.
Kum ban pynkynmaw, tang na daw ka jingsynjor ka Jingkieng Dwarksuid ka barim ka sorkar jylla ka la tei ruh da ka jingkieng Nar (Bailey Bridge) ban ïaid tang ki Kali ba kit khia, hynrei kane kam shym la neh snem na ka daw ba katei ka jingkieng tang shipor ka treikam bad ba la bun tang kaba hap ban maramot ïa katei ka jingkieng nar.
Kumba la lap bad sakhi ha ka ka jingleit jurip, la sakhi ruh ba ka NHAI ryngkat ka Company ki la pyrshang ban pynsted ïa ka kam kaba dei katkum ka jingdawa ka por bad kumba la paw shabar shen ïa kane ka jingkieng yn lah ban pyndep noh ha kaba la siang rong ruh ban pynïaid pat ïa ki Kali paidbah na katei ka Jingkieng ba thymmai.
Dang shen ruh haba la ioh ban ïa kren bad u Project Director ka NHAI, u Anand Singh Chauhan, u la ong ba na ka liang ka NHAI ruh ka la shim khia ban pyndep noh kham kloi ïa kane ka jingkieng ba thymmai, ha kaba ka Company kaba trei ïa kane ka jingkeing ka la pynsted ïa ka kam bad kan nym shim por ruh ban pyndep ha kaba sang tang khyndiat bnai ym pyndep noh khnang ba ki paidbah ba leit ba wan bad wat ki Kali Motor ruh kin ioh noh ban ïaid lyngba kane ka jingkieng ba thymmai kaba long ka jingshngaiñ ïa ki paidbah, u la ong.