Mawkyrwat, Nohprah, 18: Ka Federation of Khasi Jaiñtia & Garo People’s (FKJGP) jong ka South West Khasi Hills District ha ka jingïalam u Balse Kharbani, General Secretary ka FKJGP ki la ïoh ban leit ïakynduh ïa ka Directorate of Health Services (DHS) halor ka jingthmu ka sorkar ban plie noh ïa ka jaka sumar ba 100 jingthiah hapoh Maw-kyrwat CHC.
Katkum ka kyrwoh ba la phah da u Balse Kharbani, General Secretary ka FKJG, South West Khasi Hills District u la ïathuh ba ka jingleit ïa ka kynduh ka seng ka long ban leit wat hato ki jingmang ne sanction haba ïadei bad ka jaka sumar ba shi spah jingthiah ki la biang ne em. Hynrei katkum ka jinglap lyngba ka jingïathuh na liang ka Directorate ka la pynpaw ha khmat ka seng ba na ka liang ka department ka la pynkhreh khamtam ki doktor ki ban don ne trei ha ka bynta ka shi spah jingthiah, u la ong bad ba ïadei bad ki nurse bad kiwei kum ki Laps kin sa khot nongaplai noh ha kine ki kyndiat sngi.
Shuh shuh haba ka seng ka kylli haba ïadei ba ki tiar ban sumar ïa ki nongpang kum ki X-ray, ki scanning mechine bad kiwei kiwei kin sa ai katkum ka jingdonkam namar kine baroh ym wanrah hadien ba la dep thung ïa ki nongpyntreikam ne ki operator bad na ka bynta kine ruh ki la pynkhreh ban khot nongaplai namar kine baroh hap khot nongaplai na ka Head Office kata na Directorate of Health Services (DHS). U bah Balse u la ong ruh ba haba kylli na bynta ki kam ba lait ba dang shu thung shen, ka Director ka la ong ïa ki ba kito ki dei tang ki briew ba shu thung shipor ne temporary bad kan kut noh tang lai bnai, bad na ka bynta kito ka department kan sa phah sha District Selection Committee (DSC) ba kan khot nongaplai namar ki don ki ki kam ba lait kiba khot nongaplai na department ki don ki ki kam ba lait ban hap pynleh na DSC.
Kumta ka seng ka kyntu ïa ka Directorate ba la dei ïa kino kino ki ki kam ba lait ki dei ban leh haba shit ba shai dei ban da da buh ïa ki notice hapoh ophis jong u District Health Office (DHO), bad ban pyntip lyngba ki lad pathai khubor khnang ba ki samla ki la nang la stad kin ïoh ban thep ha kita ki kam ba lait namar lada ban shu thung sop sop, ka seng kam nym pdiang da lei lei, bad lada don kam ban ïa mih madan ruh kam banse na ka bynta ka jingmyntoi jong ki khun samla wat kat wat jam.
Ka seng ha kajuh ka por ka sngewkmen ban jingtip ba ynsa ïoh plie noh ïa ka jaka sumar ba shispah jingthiah hapoh ka Mawkyrwat CHC bad ka kyrmen ba kane ka jaka sumar kan ïaid beit ïaid ryntih bad kyrmen ruh ba kan ai jingshakri pura ïa ki paidbah jong ka dong ka thaiñ khamtam ki kup shiliang sem shiliang ki bym kot bor ban leit sha ki Hospital Private.
U la ruh ba ka seng kam nym shongkli kti nangne shakhmat hynrei kan sa nang bud-dien shuh shuh la hato ka jingtreikam kane ka jaka sumar ka long em katkum ka jingïakren bad ka Directorate, bad ka lah ne em ha ki rukom ban ai jingshakri ïa u paidbah ka dong ka thaiñ kumba ki paidbah ki la angnud la slem ban plie noh ïa kane, namar ïoh lehse kan don tang ki jingthiah khlem ki doktor, khlem nurse, kan long pynban ka jingtim ïa ki paidbah kiba leit phah sumar hangto.
