Ïa ki 60 ngut ki nongïalehkai, pynkup burom ka ophis u DSO, South West Khasi Hills District

Mawkyrwat, ‘Nailur, 30: Ka ophis jong u District Sports Officer (DSO), South West Khasi Hills District lyngba ka District Sports Promotion Society (DSPS), South West Khasi Hills District ka la ïoh ban pynkup burom ïa ki 60 ngut ki ‘rang bad ki ‘thei ïalehkai jong ka distrik kiba la ju mih khmat sha kiwei pat ki jaka bad kumjuh ruh kiba la wanrah nam wanrah burom lyngba ka jingpoi jong ki sha ka thong jong ka jingjop.
Ïa ka jingïalang ha kane ka sngi la pynlong hapoh ka Hall jong ka Maharam Government Higher Secondary School, Mawkyrwat ha kaba ka kong J. Kharpuri, MCS, Additional Deputy Commissioner, South West Khasi Hills District ka la long kum ka kongsan ha ryngkat ka jingïadonlang u bah S. Marweiñ, MCS, Extra Assistant Commissioner, South West Khasi Hills District ryngkat kiwei de ki ophisar jong ka distrik.
Ka kong J. Kharpuri, MCS, Additional Deputy Commissioner, South West Khasi Hills District haba kren ha ka jingïalang, ka la ong ba kane ka sngi ka dei ka sngi jong ka jingjop jong ki nongïalehkai la ka long ki shynrang ne kynthei namar lyngba ka jingtrei shitom jong ki ki la ïoh ban pdiang ïa ki jingaisngewbha. Namarkata, ka la ai mynsiem ïa ki ‘rang bad ki ‘thei ïalehkai jong ka South West Khasi Hills District kiba la shah pynkupburom mynta ka sngi ba kin nangïai trei shitom nangne shakhmat khnang ba kin long kita ki khlur ki ban mih khmat ym tang ïa ka distrik, hynrei ïa ka jylla bad ka Ri India ruh. Ka la long ruh ba ka kam ïalehkai ha kine ki sngi la sakhi ruh ba ka la long kawei na ki lad ban ai kam ai jam ïa ki briew namar lyngba ka jingtrei shitom bad jinglen lade jong ki da kaba ki pynlut ïa ka por bad bor ym tang ha kiei kiei ki bym myntoi hynrei ha kiba long ka jingmyntoi na ka bynta ka lawei.
Ka la ong ruh ba ka jingïalehkai ka long ruh kawei na ki bynta ban pyllait ïa ki briew ba kin ngop ha ki jingsniew kiba bun jait khamtam eh ban pyllait na u drok, ka kyiad bad kiwei de ki jingdih kiba pyntroiñ ïa ka met namar lada ki pynlut por bad pynleit jingmut ha ki kam ïalehkai kin nym don por ban leh ïa kiba sniew namar ka jingmut jingpyrkhat jong ki ka long kaba palei. Ha kajuh ka por ka la ai jingïaroh ruh na ka bynta ki nongïalehkai ba watla kim da don ïa ki jaka kilanmet kiba biang ne kiba paka hynrei lyngba ka jingtrei shitom ki la wanrah pynban ïa ka nam ka burom ïa ka distrik baroh kawei.
Ka kong Kharpuri ka la pynkynmaw ba ka jingïalehkai kam dei eh tang ka bynta ban ïoh rah ïa ka nam ka burom lyngba ka jingjop hynrei ka dei ruh ka bynta ban wanrah pynïoh ha ki ïa ka jingkoit jingkhiah ha ka met ka phad jong ki briew. Namarkata, ka la kyntu ba kum ki khynnah bad ki khun samla ki dei ban pyndonkam hok ïa ka sap ba ki don khnang ba kin lah ban ïoh kheit ïa u soh jong ka jingjop.
Kiba la shah pynkup burom ha kane ka sngi ki long kiba ïashimbynta ha ka Softball, Athletics, Archery, Swimming, Kick Boxing, Boxing, Karate bad Football kiba dei jong u snem 2019-‘20. Nangta, kiba ïalehkai ha ka Athletics jong u snem 2021-‘22.
Ïa ka jingïalang la lam khmat da ka kong D. Lyngdoh bad ka kong V. Khyriem bud da ka jingkren pdiang sngewbha na u District Sports Officer (DSO), South West Khasi Hills District, u bah D. Synkon bad ka jingkren na u bah Y.G. Lyngdoh, Working President ka Mawkyrwat District Sports Association (MDSA).
Ïa kane ka sngi la pynshit pynshngaiñ ruh da ka jingrwai na u samla Pulljohnstar Wanniang bad na ka samla Great Mercy Langte.