Plie u Myntri Rangbah ïa u Maw Nongrim ban pyntrei noh ïa ka surok Nongstoiñ-Maweit

Nongstoiñ, Nailur 30: U Myntri Rangbah jong ka sorkar jylla u Conrad Kongkal Sangma hynne ka sngi u la ïoh ban plie ïa u maw nongrim jong ka surok na Nongstoiñ sha Maweit.
Ha kane ka sngi plie ïa utei u maw nongrim kaba la long hapoh ka madan jong ka St.Mary’s Secondary School Maweit Parish, la ïadon lang ruh u MLA jong ka thaiñ u Bah Gigur Myrthong, MLA jong ka Nongstoiñ Bah Macmillan Byrsat, u Deputy Commissioner jong ka WKH, u SP, u Superintending Engineer ka tnad PWD (Road) Western Circle, u Executive Engineer ka tnad PWD, ki nongtrei katei ka tnad, ki ophisar jong ki tnad treikam bapher bapher, ki Nongïalam shnong bad da ki hajar ngut ki paitbah kiba la wan ban sakhi ha katei ka sngi.
Ïa katei ka surok kaba jngai tang kumba 23 kilometer ka ban sdang na Nongstoiñ bad kan poi shuwa tang tang hapoh Wahlyngdoh, la bei tyngka lyngba ka Meghalaya Integrated Transport (MITP) jong ka World Bank, ka ban ïaid lyngba ki shnong kiba kynthup ïa ka shnong Nongpyndeng, Mawlait, Nongtraw, Wahlyngdoh, Nongsba, Mawdong bad Miangshang.
Ka jingpyntrei ïa katei ka surok ka kynthup ïa ka jingpynheh haduh Intermediate lane bad yn siang rben bha ha kaba ka mang tyngka na ka bynta ka jingpyntrei ïa katei ka surok ka la kot haduh Rs.98, 26, 14,300/- (Khyndaiphew phra klur arphew hynriew lak khatsaw hajar bad lai spah tyngka) ha kaba yn pyndep tang 36 bnai.
Ha ka jingkren jong u Myntri Rangbah u la ong ba ka thaiñ Maweit, ka dei ka thaiñ kaba la shah iehnoh beiñ la kham slem bad u la sngew kmen ba ka sorkar ha kane ka kynti ka la ïoh ban pynurlong ïa ka jingkwah kaba la slem bha jong u paitbah ka thaiñ Maweit. U la pynkynmaw ïa ka jingwan jong u 6 snem mynshuwa hapoh Maweit na ka bynta ka jingïaseng ICYM ha kaba u la mad shisha ïa ka jingsniew jong ka surok.
“Ka long shisha ka histori hapoh ka thaiñ Maweit ha kaba hadien ki 57 tylli ki snem, la lah ban plie paitbah ïa u maw nongrim bad kaba la pynhun jrut ym tang ïa ki paitbah, hynrei ïa nga shimet namar ka dei ka surok kaba la angnud lah slem bad mynta ka la urlong”, ong u Myntri Rangbah. U la ong ruh ba ka surok kaba bha kan nang wanrah shuh shuh ïa kiwei pat ki kam pynroi hapoh katei ka thaiñ, lyngba ki surok kiba bha kan kyntiew ruh ïa ka ïoh ka kot jong ki paitbah katei ka thaiñ, namar lada ngi la ïoh ïa ka surok kaba bha kiwei pat ki kam pynroi kin nang bud ter shi ter.
U Myntri Rangbah u la ong ruh ba ka sorkar ha kine ki 4 snem tam ka la ïaleh ban pynïoh surok jan man ki shnong bad dei tang kane ka sorkar, kaba lah ban theh khambun ki kam pynroi lyngba ki surok bad ki lynti ki syngkien hapoh West Khasi Hills.
U la ong ruh ba ka sorkar ka la dep ban theh da ki hajar klur tang na ka bynta ki surok hapoh ka thaiñ West Khasi Hills, kaba kynthup naduh ka PMGSY bad National Highway ïa kaba la leh klet da ki sorkar ba mynshuwa, ha kaba khambun na ki surok la mang tyngka na ka skhim jong ka sorkar kmie lyngba ka CRF bad RIDF.
U Myntri Rangbah u la ai ruh ka jingïaroh ïa u MLA jong ka thaiñ Mawshynrut u ba la trei shitom ban pynlong kam bad ban pynurlong ïa katei ka surok hapoh Maweit bad dei lyngba ka jingbuddien jong u ba katei ka surok ka la poi sha ka thong jong ka jingjop ka ban ai ka jingmyntoi nakabynta u paitbah jong katei ka thaiñ.
Ha kajuh ka por na ka liang jong u Myntri Rangbah u la kular ruh ha katei ka sngi, ban kyntiew kyrdan noh ïa ka Maweit PHC sha ka CHC kata ban kyntiew shaduh 50 jingthiah, ha kaba ïa kane u la kular ba un sa ïakren bad u Myntri ka tnad ka koit ka khiah, ban pynsted ïa ka jingmang tyngka, khnang ba kan ai jingmyntoi ïa ki paitbah jong katei ka thaiñ Maweit.
U Myntri Rangbah u la pynpaw ruh ba ka koit ka khiah ka dei ka mat kaba hakhmat eh ïa ka sorkar ba kan buh ka thong na ka bynta ban pynïoh ïa ki lad jingsumar kiba bit ba biang. Kumjuh bad kat ka jingheh jong ka thaiñ Maweit ka la dei ban kyntiew kyrdan noh sha ka CHC, kumta u la kular hakhmat ki paitbah ba ïa katei ka jingkyntiew kyrdan ïa katei ka PHC sha ka CHC, yn sa leh noh shen namar kadei ka mat kaba donkam tam ïa ki paitbah katei ka thaiñ.