Shillong, Jymmang 19 : Ki ar tylli ki party ba don ha ka Liang Pyrshah ba kynthup ïa ka All India Trinamool Congress (AITC) bad ka Indian National Congress (INC) ha ka sngi Thohdieng ki la pdiang sngewbha ïa ka rai jong ka sorkar na ka bynta ban pyntreikam ïa ka roster system da kaba pyntreikam nangne shakhmat (prospective).
Haba kren bad ki lad pathai khubor hadien ka jingïalang jong baroh ki seng saiñpyrthei hynne ka sngi ha Secretariat, u MLA barim bad Vice President ka party, Zenith Sangma u la ong ba ka jingïalang ka la plie lad ïa ki ban tip shibun kiei kiei haba ïadei bad ka roster system bad kumno ynda la pyntreikam ïa ka.
Katkum ka jingong jong u, kano kano ka bynta kaba la don ïa ka reservation policy dei ban don ka roster system kumba la kdew da ka aiñ. U ong ruh ba ka jingtuklar jong ka High Court kadei namar ym don satia ka roster system wat ha ba la don ïa ka reservation policy.
“Ka sorkar ka la kular ba yn sa thaw ïa ka komiti haba ïadei bad ka jingpyntreikam ïa ka roster system kaba kynthup ïa ki dkhot naman la ki sengsaiñ pyrthei,” u la ong.
Haba bynrap lang, uwei pat u Vice President ka Party, Bah George Lyngdoh u la ong ba ka party ka dawa ba ka jingpyntreikam ïa ka Roster System kadei ban long nangne shakhmat bad ïa kane ruh ka sorkar ka la mynjur.
Ha kajuh ka por na ka liang u nongïalam ki MLA Congress, Bah Ronnie V Lyngdoh u la ong ba ka sorkar jylla ka la kular ba ïa ka roster system kan pyntikan ba kan ym don satia ka jingshah liang ïa kano kano ka jaidbynriew.
“Ka Roster System kan pyntikna ba ka reservation policy kaba ngi don 40:40, 15 bad 5 persen yn pyntreikam pura ïa ka ha ka lynti kaba dei. Ngi dang da ka jingkmen hadien ba ngi la ïoh ïa ka jingpynshai bad khamtam haba ngi la ïoh ïa ka jingpyntikna ba kan ym don kano kano ka jingshah liang ïa kano kano ka Jaidbynriew, bynrap biang u Bah Ronnie.
Nalorkata, u ong ruh ba ka la shai mynta bad ki samla ruh kim dei shuh ban khuslai namar ka sorkar ka la dep ban pyntikna ba kan ymdon kano kano ka jingleh shilliang khmat ïa kano kano ka jaidbynriew.
Katba ki artylli ki Party ka VPP bad ka KHNAM ki la pynpaw ba kim hun satia ïa ka jingïalang ba la khot da u Myntri Rangbah. Ka VPP ka la pynpaw ba kam kwah ban ïakren ïa ka Roster khlem pat ïakren shuwa ïa ka Reservation Policy. Na ka liang ka KHNAM ruh ka la pynpaw ba ka jingdawa jong ka ruh ka long ban pynbeit tthymmai shuwa ïa ka Reservation Policy.
