Ba wan poi ki phetwir na Manipur, kyntu ki Dorbar Shnong ïa ka Sorkar ban shim kyrteng thik pa thik

0

Shillong, Jymmang, 19: Ka Synjuk ki Nongsynshar Shnong Nongthymmai Pyllun, ka Dorbar Shnong Madanryting, Umpling, Nongmensong lem bad ka Khasi Students Union Nongthymmai Circle bad Shillong Mihngi Circle ha ka sngi Thohdieng ki la phah da ka jingthoh sha u Myntri Rangbah ka Jylla u Conrad Kongkal Sangma ban ai jingmut ha kaba ïadei bad ka jingpoi jong ki phetwir riewlum na ka Jylla Manipur ban wan rieh tngen shipor ha nongbah Shillong hadien ba la khie ka jingïakynad bad ka jingïaumsnam hapdeng ki riewlum Kuki bad ki Meitei ki bym dei ki riewlum.
Katkum ka dorkhas, kine ki Dorbar Shnong bad ka KSU ki la ai jingmut ïa ki paidbah nongshong shnong jong ka Jylla Manipur ban poi noh sha ka jingïasngewthuh jingmut bad ban sangeh noh ïa ki jingïaumsnam khnang ba ka shongsuk shongsaiñ kan dup wan phai biang sha ka jylla naba kum kine ki jingïakynad kin wanrah ïa ka jingduh ei ki mynsiem briew bad ka jingjulor jong ki mar ki mata bad ki jingdon jingem.
Kine ki Dorbar Shnong kiba la shong ïa ka jingïalang bad ki nongïalam jong ka KSU ki la rai ban kyntu ïa ki Dorbar Shnong ba kin dei ban pyrta da ka tynghung da kaba bthah ïa ki trai ïing ba ki dei ban pyntip sha ki Dorbar Shnong lada don kino kino ki riewthymmai kiba rung hapoh ki shnong khamtam ïa kito kiba wan nabar ka jylla shwa ban ai wai ïa ki ïing shongwai lane shwa ban ïasoi ïa kano kano ka jingïasngewthuh jingmut. Kino kino ki pynkheiñ ïa kane ka hukum kin shah pynshitom katkum ki kyndon aiñ.
Ki la pyntip ruh ba ki ar tylli ki Relief Centre kiba don ha Madanryting bad ha Lapalang, Shillong ba la pynsah ïa ki jaidbynriew Kuki ki dei ban hap hapoh ka jingpeit jingkhmih bad ka jingpynïaid jong ka Sorkar Jylla.
“Da ki hajar ngut ki paidbah, la ïoh jingtip, ba ki la phet na la ki shnong bad wan poi ha nongbah Shillong bad kane ka lah ban wanrah ïa kano kano ka jingjia bym sngewtynnat hapoh ka nongbah bad namarkata ngi kyntu ïa ka Sorkar ba kan shim da ki sienjam kiba eh khnang ban khanglad ïa kino kino ki jingjia hapoh ka jylla,” la ong ka dorkhas.
Ha kajuh ka por, ki Dorbar Shnong bad ka KSU ki la pynpaw ruh ba ka jingbym shim kyrteng ïa ki briew kiba nabar kiba wan rung sha Jylla kan pynlong ïa kine ki briew ban ïoh sah duh junom ha Shillong bad ha kiwei kiwei ki bynta jong ka Jylla. “Ngi kyntu ïa ka Sorkar ba kan shimkhia ban shim jingkhein bad ban lum kyrteng thik pa thing khnang ba ynda ka shongsuk shongsaiñ ka la wanphai ha Manipur ïa kine ki briew dei ban mih noh na kane ka jylla Meghalaya,” la bynrap ka dorkhas.
“Ngi khmihlynti ba dei ban leh eiei na ka liang jong phi khnang ba ka jylla kan don hapdeng ka shongsuk shongsaiñ mynta bad ha ki sngi ki ban dang wan ruh kumjuh,” la kyntu ki Dorbar Shnong bad ka KSU ïa u Myntri Rangbah.

Leave A Reply

Your email address will not be published.