Ka aiom lyiur kala poi donkam ban ïatreilang lada wan ka jinglynshop mariang : DC WJH

Jowai, Jymmang 19: Ka ophis u Superintendent of Police ka West Jaiñtia Hills District mynta ka sngi thohdieng kala pynlong ïa ka prokram ban ïa phylliew jingmut lang bad ki nongïalam shnong Village Defence Party (VDP) halor kumno ban wanrah ïa ka jingshong suk shong shngaiñ hapoh ka shnong ka thaw da ka jingïatrei lang kaba ïajan eh bad ka tnad pulit.
Ïa kane ka prokram la pynlong ha Indoor Sports Hall Chutwakhu Cum Auditorium, Jowa ha ka jingdonlang jong u kongsan uba dei ruh u Deputy Commissioner ka West Jaiñtia Hills bah Batlang Samuel Sohliya, IAS, u symbud kongsan SP ka WJHD u Chemphang Syrti, MPS nalor kiwei de ki ophisar Pulit jong ka District.
Ïa ka jingïalang la pynïaid da u bah G. Marshillong (SDPO) Amlarem, la ïoh ruh ka jingrwai ba kyrpang na ki kynhun Pulit kaba la tip kum ka Meghalaya Police Cultural Troupe (MPCT) kaba la ai lai tylli ki jingrwai tynrai bad ka jingrwai phareng ban pynshongshit ïa katei ka prokram.
Na ka liang u kongsan u bah Sohliya ha ba ai jingkren ula ai ka jingïaroh ïa ka tnad pulit jong ka West Jaiñtia kaba la shim ïa kane ka kam ba kongsan eh ban ïaphylliew jingmut lang na ka bynta ka bha ka miat ha ka imlang ka sahlang.
Ula ong ka jingwanbun ki nongïalam VDP mynta ka sngi na ki shnong bapher bapher kan ïarap shuh shuh ban ïaleh pyrshah kumno ban rad diengkhong ïa ki kam sniew hapoh ka shnong ka tnaw naduh ki kam buaid tanglang, ki kam tuh kam thim, nalor kiwei kiwei de ki jait jingsniew.
Ula ong ba um dei ban shim ïa ka aiñ ha kti hynrei kum ki VDP ki dei ban aiti sha ki bor ka aiñ khnang ban ïoh leh ïa kaba donkam, namar ka jinglong hok jong uwei pa uwei u briew u don hapoh ka Ri India katkum ki kyndon ba la pynbna da ka sorkar (Human Right Act).
“Ki VDP ki dei ki nongtrei mon sngewbha ban wanrah ïa ka bha ka miat wat lada kim don kano kano ka jingïoh nong hynrei kila pynlut ka por miet la bad sngi ban wanrah ka jingshong suk hapoh ka shnong ka thaw” ong u bah Sohliya
Kum u Khlieh duh ka District u ai ka jingïaroh ïa ki VDP ba dei lyngba jong ki kane ka Election MLA ba la dep la lah ban pynïaid beit pynïaid ryntih ïa ka hapoh ka District, “haoid ki la don hi katto katne ki jaka ba mih jingïa khajia hadien ba la dep ka jingñiew vote hynrei la lah ban teh lakam ïa ki da ka jingtreilang jong ki bor shnong (VDP).
Shuh shuh ula kyntu ba ka por jong ka aiom slap (Lyiur) ka la poi bad kan sa don ka jingwan lyngshop mariang, kumta u kyntu ïa u VDP ban ïatreilang bad ki bor jong ka Disaster Management khnang ban suk ka rukom ai jingïarap lada don kino kino jingjia. Da kaba pynkut ïa ka jingkren u kyntu ïa ka tnad Pulit ban pynlong man ka por kum kine ki jait prokram kiba ïadei bad ki VDP shnong kaba lah ban wanrah ka jingshong suk shong shngaiñ.
Na ka liang u SP ma C. Syrti ha ka jingkren ula kyntu ïa ki VDP ban don ka jingïatreilang kaba ïajan bha bad ki Pulit khnang ba yn lah ban ïaleh ïa ki kam sniew, ula ong ruh ba ka tnad pulit kan pyrshang katba lah ban ai jingïarap sha ki VDP da ki Touchligh bad kiwei de ki tiar donkam ban pahara shnong.
Halor ka jingwad kam Pulit jong ki khun samla ha kine ki sngi ba mynta ula kyntu ban long kiba la pynkhreh lypa namar shen ka tnad pulit kan sa khot (Advertisement) ïa ki kam pulit ba bun bha ha kine ki sngi ban wan.
Ha ka juh ka por u khot ïa ki nongïalam VDP ban treishitom na ka bynta ban ïaleh pyrshah ïa u Drug bad kaba nyngkong dei ban sdang shwa nala ïing, ong u SP.
Ha kane ka sngi hadien jong kane ka prokram la don ka jingïaphylliew jingmut lang, kaba la shim bynta da kitei ki VDP shnong jong ka District bapher bapaher kiba la don 400 ngut na ki 272 tylli ki VDP kiba la poi sha kane ka sngi bad ki ophisar Pulit kiba la jujab ïa ki jingkylli. Katba ïa ki kyntien ai khublei la ïoh da u ma F. Passah (COVDO).