Khliehriat jymmang 19: Ka long shisha kaei kaei kaba isaitmet haduh katta katta ban iohi ia ki ñiut, ki jakhlia, ki jaboh kiba la shu bret pathar da ki nongtrei jong ka company dewbilat, ka Amirit Cement Limited, kaba don ha shnong Umlaper, ka jingbret pathar ia ki ñiut ka long kaba la i khlemakor haduh katta katta bad kaba buh jingma ruh ia ka koit ka khiah jong ki nongshong shnong.
Nalor kane ka jingbret ñiut pathar, ki dang don ruh shibun kiei kiei kiba katei ka company ka la leh haduh ba ka la pynlong ia u Chairman Shnong Umlaper, ki nong shong shnong bad ki nongialam jong ka Hynñiewtrep Youth Council East Jaiñtia Hills District ba kin sngew bitar, namar ba ka rukom leh ki heh bad ki nongtrei jong ka Amrit Cement ka paw shynna ba kim shym la burom satia ia ki nongshong shnong.
Haba iakren bad ki pathai khubor, u President jong ka Hynñiewtrep Youth Council East Jaiñtia Hills District, u bah Preios Pale, u la pynpaw ka jingsngew bitar bad sngew diaw halor ka jing leh khlemakor ka Company Amrit kaba don ha shnong Umlaper bad u la ong ba na ka liang ka seng ka dawa ba ka company Amrit ba ka dei ban burom ia ki nongshong shnong bad ki bor pyniaid shnong jong ka shnong Umlaper, kumjuh ruh ban pyrkhat lang ia ki nongshong shnong ban thungkam ia ki ha katei ka company, namar kumba long mynta, ym pat don uwei ruh u nongshong shnong jong ka shnong Umlaper u ban ioh kam ha katei ka company “Kane ka dei shisha ka jingbym kheiñ snep ka company ia ki nongshong” pynpaw u bah Preios Pale.
Utei u nongialam jong ka HYC na East Jaiñtia Hills District, u la pynpaw ruh ka jingsngew khia halor ka jingbym pat lah ban pynurlong ia ka jing kular ba katei ka company Amrit kala dep kular ia ki trai shnong ban pynkynriah noh ia ka shnong sha ka jaka kaba kham pajih na ka karkhana, khnang ba kan nym ktah ia ki nongshong shnong, na ka liang ka seng ka dawa na katei ka company ba ka dei ban pynurlong noh kloi ia kane kaba la dep kular, khnang ba kan nym ktah ia ka koit ka khiah jong ki nongshong shnong.
Na ka liang ka seng, ka byrngem ruh ba lada katei ka company kam sngap ia ki jingdawa bad lada kam pynurlong ia ka jingkular, ka seng kan iaid da kawei pat ka lynti. Kumjuh ruh na ka liang u Chairman shnong jong ka shnong Umlaper, u bah Poila Pdang, u la pynpaw ka jingsngew khia halor kitei kiei kiei kiba ka company Amrit ka la leh, kaba khlem kheiñ briew shuh ia ki paidbah nongshong shnong “Man la ka por, ngi na ka liang ka shnong ngi la leit ban iakren bad ki heh jong ka company, ha kaba iadei bad ka jingbret ñiut pathar, ha kaba iadei bad ka thung kam thung jam bad ruh ban pynkynriah noh ia ka shnong shaba kham pajih kumba ki la dep kular, hynrei kine baroh kim poi shano shano ruh” ong u Chairman Shnong Umlaper.
U la iathuh ruh ba katei ka company kam ju pyrkhat lem ia ki nongshong shnong kiba ju leit ban shim dawai na ka dispensary jong ka company, ha kaba ki nongshong shnong ki hap beit ban siew da ka pisa haba ki leit shim dawai na ka dispensary jong katei ka company, namar kumba long kiwei kiwei ki company kiba don hapoh ka district, ki don ki dispensary bad haba ki briew ki leit wad dawai kim ju shim pisa katba katei ka company Amrit pat kam shah satia bad ki ba shim dawai ki hap beit ban siew da ka pisa.
Kum ban shu kynthoh, mynta la don kumba shibnai tam, ki bor pyniaid shnong jong ka shnong Umlaper ki la iakynduh lang bad ki heh jong ka company Amrit ha ophis u Deputy Commissioner ha Khliehiriat bad ki heh ka company ki la kular ba kin pynkhuid noh ia ki ñiut, ki jakhlia ba la bret pathar sha ki jaka shnong, hynrei la sngewthuh ba haduh mynta ruh kitei ki ñiut ki dang satah ha ki jaka shnong, ki la kular ruh ban shim khia ha kaba iadei bad kiwei kiwei ki kam kumba ki la kular, hynrei haduh mynta kawei ka kam ruh kam pat shym la urlong satia, kane ka jingleh ka company ka la pynbitar bad pynsah umdum ia ki paidbah nonshong shnong.
