Hiar jurip u Bah Paul Lyngdoh ïa ka Integrated Tourism Complex ha Nongpoh, kmen ba ïaid shaid shaid ka kam
Nongpoh, Jymmang 19: Kum u myntri ka tnad ba dei peit ïa ka tnad Tourism hapoh ka jylla, u Bah Paul Lyngdoh mynta ka sngi u la hiar ban leit jurip ïa ka Integrated Tourism Complex kaba don ha Mawdiangum, Nongpoh ha Ri Bhoi District.
Haba leit ban jurip ïa katei ka Integrated Tourism Complex kaba don ha Nongpoh, la synran lang ruh daka jingdon lang ka Kong Caramai Kharkongngor, kaba dei ka Secretary ka sorkar Meghalaya jong ka tnad Textile, ka R.B Lyngwa, District Sericulture Officer bad kynthup kiwei kiwei ki ophisar na ka tnad sorkar.
Haba leit ban jurip ïa katei ka jingtei jong ka tnad tourism, u Bah Paul Lyngdoh u la wan ban jurip na ka bynta ban peit ban khmih halor ka jingïaid jong ka kam kaba u la shim khia ban pyndep kloi noh ïa katei ka jingtei na ka bynta ban ai jingmyntoi ïa ki paidbah.
Haba kren ha kane ka jingwan jurip, u Bah Paul Lyngdoh u la pynpaw ïa ka jingsngewhun halor ka jingtei ïa kane ka Integrated Tourism Complex ha Nongpoh bad na ka bynta ban pyndep noh kham kloi ïa kane ka jingtei u la kular ruh ban shim khia na ka bynta ban pynlait noh ïa ka second installment khnang ban lah ban pyndep noh kham kloi ïa katei ka jingtei jong ka tnad tourism.
Kum u myntri ka tnad tourism, u Baha Paul Lyngdoh u la kular ruh ban shim khia ban buddien ïa kane ka jingtei lane ka jingpyntrei ïa kane ka jingtei khnang ba ka jingtei ïa kane ka Integrated Tourism Complex kan long kaba jop. U la ong ruh ka sorkar ka la shim khia ruh ban tei ïa kane ka jingtei ka long ba ka don ka thong ban kyntiew ïa ki kam jngohkai pyrthei, namar kum ka sorkar ka khmih lynti ba kane ka Integrated Textile Tourism Complex kan ai jingmyntoi shisha ym tang ïa ka sorkar bad ïa ki paidbah ka jylla hi baroh kawei.
Shuh shuh, u Bah Paul Lyngdoh u la wan ruh ban jurip ïa kane ka Integrated Textile Tourism Complex ka long ruh ka jingshim khia jong ka sorkar ban kyntiew ha ki liang baroh bad khamtam ban kyntiew ïa ka ioh ka kot jong ki paidbah ha ka jylla hi baroh kawei.