Plie u ma Wailadmiki Shylla ïa ka Extension Building jong ka tnad Jowai Municipal Board

Jowai, Jymmang 19: U ma Wailadmiki Shylla uba dei ruh u MLA ka Jowai bad Chairman ka MUDA, mynta ka sngi 19 tarik u Jymmang ula wan ban plie ïaka Extension Building jong ka Jowai Municipal Board (JMB) (first floor), ha ka jingïadonlang u Chairman ka JMB ma Lasooki Lakiang, MDC JHADC ma Evening Teron (EM), Ailad Bhoi (EM), Octamewot Lamin, ki Waheh, ki sahep bad nongtrei ka JMB nalor kiwei de kiba la shah khot sngewbha.
Ïa ka jingïalang la pynïaid da ka Chief Executive Officer (CEO) Jowai Municipal Board kong D.V. Lyngdoh (MCS).
U ma Wailad haba kren ula ong ba u dap da ka jingkmem ban ïohi ba ka JMB, kala nangkiew ha kaba bun ki liang bad kane ka jingpynïar shuh shuh ïa ka ïing treikam kane ka tnat, kan pynsuk shuh shuh ïa ki nongtrei kane ka ophis ha kaba kane ka ophis kan ïoh lad ruh ban pynlong ïa ki awareness programme bapher bapher namar ha kane kaïiing ba dang dep shna la don ruh ka Hall ban pynlong programme namar ka Municipal ka don shibun ki programme pynsngewthuh paidbah.
Ha ka jingïadei bad ka jaka bret nuit (landfills), ula ong ba lyngba ka jingïatrei lang bad ki tnat bapher bapher ym slem shuh yn ïoh noh ïa ka jaka bret ñiut na ka bynta ka nongbah Jowai. U ma Wailad ula khot ruh ïa ka jingtreilang jong baroh ki Waheh Shong bad ki paidbah ha ka jingïadei bad ka jingwanrah ïa ka jingkhuid jingsuba hapoh ka sor Jowai.
Kumba long mynta ka JMB kala biang ki jingdonkam naduh ki kali kit ñuit kiba long ha ka juk mynta, ka JCB, ki Tractor bad kiwei, sa tang ban ïoh noh ïa ka jaka bret ñuit kaba paka bad kumba long mynta ka JMB kam shym la shong kli kti ban pynkhuid ïa ki ñuit na sor Jowai da kaba wad bun ki lad ki lynti kat bym pat ïoh ïa ka jaka ba paka ne permanent, ong u ma Wailad.
U la ïathuh ruh ba ka JMB ka don ruh shibun ki skim bapher bapher ban ïarap ïa ki briew ba shong basah ha sor, kumta ula kyrpat ïa ki briew ba ki dei wan mih sha ka ophis jong ka JMB ban tip ïa ki scheme bapher bapher kiba kane ka tnat ka don, na ka liang jong u, u la kyntu ruh ïa ka CEO ban pynlong ïa ki programme pynsngewthuh paidbah halor ki scheme bapher bapher jong ka JMB.
Katba u Chairman ka JMB u ma Lasooki, u la ong ba kumba long mynta ka ophis jong ka JMB ka don ka scheme ba 12 hajar tyngka ban ïarap pynshna painkhana ïa ki bym pat don paiñkhana ne septic tank, na ka liang jong u, u la kyrpat ïa kito ki briew ba donkam ba kin wan shim ïa kane ka jingïarap jong ka sorkar, namar ym shah shuh ban pyntuid ïa um paiñkhana ha ki duid ne nala ki ban poi sha ki wah bah kiba long ki thyllong um dih umbam.