Lai sngi ai por ka UHM bad ki 17 shnong ka Rambrai ïa ki bar jylla ban mih

Nongstoiñ, Jymmang 19: Ha ka sngi thohdieng ka UHM WKHD ryngkat kiwei ki para Seng Bhalang hapoh ka jingïalam u President Samla Moonstar Nongrem, ka la hiar jurip ïa ka jaka tih mar poh khyndew ha Mawïatep-Mawlangria kaba don haka thaiñ Rambrai, ha ryngkat ki 17 ngut ki Sordar Shnong bad ruh ki paidbah nongshong shnong ka thaiñ Rambrai.
Ha kane ka jingjurip ka seng ka lap ruh ïa ka jingshisha halor ka jingpyrshah jong ki shnong hapoh Rambrai ïa ka jingtih ïa utei u marpoh khyndew. Namar ki jakhlia kiba tuid na katei ka jaka kaba la ktah ïa ka umbam umdih ki paidbah bad kaba ktah ruh ïaka koit ka khiah.
U General Secretary ka District u samla Bishar Rekon Thabah, u la ong ba ka seng kam bishni ïano ïano ne kam mushlia ïa ka kam khaïi pateng kiwei, lada kam don ka jingma ne buh jingma ïa ki paidbah. Hynrei ka pyrshah ïa kino kino ki kam kiba pynthut ne pynshong syier ïa ki paidbah, khamtam kane ka jingtih marpoh khyndew ha kane ka thaiñ ka wanrah jingma ïa ki paidbah.
U la ong ba ka jingtih marpoh khyndew kumba la lap ka long ba ka ktah ïa ka tyllong um kaba don ha katei ka jaka ba tih ïa u mar poh khyndew, kaba baroh ki shnong ka thaiñ Rambrai ki pyndonkam ban dih. Lyngba ka jingtuid ki jakhlia na kane ka jaka ka la buh ïa ka jingma ïa ka koit ka khiah ki nongshong shnong.
Kumta ka Seng ka ai ka jingkyrshan ïa ki Nongïalam shnong katei ka thaiñ, ban pyrshah ïa kane ka jingtih marpoh khyndew, khamtam lyngba ki Report Survey ba lah ïoh, kam pyni shai ki tih aiu bad kane ka buh jingeh bad lehse ïoh dei pynban ki marpoh khyndew, ki ban ktah ïa ka ïap ka im ki paidbah bad kum ka seng kan ym ailad ïa kum kita kin jia ha kane ka thaiñ.
U samla Bishar Rekon Thabah u la ong ba balei la khang ïa ka Shnong Urkhli bad Mawmluh ban pyndonkam ïa ka umbam umdih ba ki ring na katei ka jaka tih marpoh khyndew. Kane ka jingkhang ban pyndonkam ïa ka um ka don kaei kaei sha lyndet kaba ktah ïaka koit ka khiah bad lada kam don eiei, balei kin shu khang ban pyndonkam ïa ka um khlem ki daw.
U ong ruh ba ki paidbah kin ym rit mynsiem haba ki leh ïa kaba bha bad kum ka Seng kan ïai don ruh syndah bad ki paidbah ka thaiñ ha kano kano por ba ki donkam.
Ha katei hi ka sngi na ka liang ka seng ka la ai ruh ka jingkyrshan ïa ki Nongïalam Shnong ryngkat ki nongshong shnong ka thaiñ Rambrai, ban leit khang noh shwa shipor ïa katei ka jaka tih mar poh khyndew, kat haduh ban da pyntikna ba kan ym don kano kano ka jingma ïa ki paidbah ka thaiñ Rambrai bad ki la ai por ruh 3 sngi ïa ki nongtrei bar jylla ba kin leit phai noh sha la ki jaka.
U Samla Bishar Rekon u la ong ruh ba ka Seng kan ym shong kli kti hynrei kan ïai nangbud dien na kawei ka por sha kawei ka por, kat haduh ba lah ban pyntikna ba kane ka jingtih marpoh khyndew kan long kaba shngaiñ ïa ki para doh para snam jong ka thaiñ Rambrai.