Hiar ïalap elekshon ka HITO sha Jirang, ther tyngeh ïaka sorkar ba long kum ka sorkar Ksuid bad Thlen
Nongpoh, Rymphang 21: Ki nongïalam ka seng Hynniewtrep Integrated Territorial Organisation (HITO) mynta ka sngi kila hiar sha ka thaiñ Jirang ban bteng ïaka jingïalap elekshon bad ban pynshai sha ki paidbah ba ki dei ban stad haba jied ïaki nongmihkhmat, ba ngim dei shuh ban dang bteng ban jied ïaki nongkhaii heh spah hynrei ki nongthaw aiñ kiba don ka jingkitkhlieh ban ïada kum ka stieh ïaka jaitbynriew.
Haba kren haka jingïalang mynta ka sngi kaba la long ha ïew Jirang ki nongïalam ka HITO naduh u Bah Donbok Dkhar President ka sengkmie, Bah Apbor Nongrum Vice President ka HITO RI-Bhoi District bad kiwei kiwei kila ther tyngeh ïaka sorkar kaba la leit noh kum ka sorkar Ksuid bad ka sorkar Thlen kaba bamduh ïaka ri bad ka jaitbynriew kumba ki paidbah kila mad ha kine ki 5 snem bala leit noh, ka jingshah thombor jong ki nonghikai, ka jingbym lah ban pynbeit ïa u pud u sam, ka jingjia ka mukroh, ka jingshah siat iap ïaki samla ka ri haki pulit ka jylla bad kumjuh ruh ki pulit Assam, ka ishu them metor, ka iohkam ka ioh jam ki samla, bad kiwei kiwei ba kum ki paidbah kila ngiah bad kdang.
“Sa katno ngin dang biej, keiñ noh bad la biang ban jied ïaki nongsam blanket, ki nongsam khiew sam pliang, kala dei ka por ba ki paidbah kin jied ïaki nongmihkhmat da ka jingstad ban pynmih ruh ki nongthaw aiñ kiba ïada kum ka stieh ïaka ri bad ka jaitbynriew, lymda kumta ka jaitbynriew jong ngi ka don hapdeng ka tmier lada ki nongkhaii heh spah kin dang ioh ban klun ïaka shuki ha Secretariat kiba la pynïasyriem kum ki thong ki bym don jabieng ban pyrkhat” la ong u Bah Donbok Dkhar.
U la ong ruh ba kum ka seng kala leit sha kiba bun ki jaka ban pynlong kum kitei ki rynsan ban ïalap elekshon pyrshah ïaka sorkar bala leit noh, hynrei naka liang ka seng kam dei ba ka ïala elekshon na bynta jongno jongno hynrei ban pynshai sha ki paidbah khnang ba kin tip kumno ban jied ïaki nongmihkhmat haka 27 tarik mynta u bnai ban lam pat ïaka lawei jong jaitbynriew shaka jingphyrnai bad jingkylla.
Namarkata naka liang ka seng HITO ka kren shai sha ki paidbah ba kim dei ban babe hadien ka 2 tarik u Lber namar kila jied hi ïano ki nongmihkhmat ba kin phah sha ka ïing Dorbar thawaiñ ka jylla, namar haka jingeh ki kynmaw tang ïaki sengbhalang bad haka sngewbha ki ïa risa bad ki nongmihkhmat.