Hato ka jingai WO ïa ki khyrdop lum khajna ka dei namar ka jingïakynduh ïa u EM Trade: MDC Sohïong

Shillong, Jylliew 26: Ki MDC ka Liang Pyrshah Khasi Hills Autonomous District Council (KHADC) ha ka sngi Palei ki la buh ka jingkylli ïa ka Executive Committee ba la ïalam da ka Voice of People Party (VPP) halor ka jingaiti ïa ki work order (WO) ban pynïaid ïa ki khyrdop lum khajna ba kynthup ruh ïa kiba talasi khlem da khot ïa ka Tender.
Haba wanrah ïa kane ka jingkylli ha ki kynta jingkylli ha ka sngi kut ka Dorbar mang tyngka ka Council, u Bah Synshar Kupar Roy Lyngdoh Thabah, uba dei u MDC ka UDP na Sohïong-Nongspung, u la ong la ïa ki Work Order la ai tang sha kito ki riewshimet kiba la leit ban ïakynduh ïa u Executive Member (EM) uba khmih ïa ka Trade, u Bah Winston Tony Lyngdoh.
“Nga kwah ban tip la ka don kano kano ka auction ban pynbeit ïa ki dor ne la ïa ki dor la rai da ka tnat,” kylli u Bah Thabah.
Haba pynpaw ïa kajuh ka jingsngewkhia u MDC ka UDP na Shella u Bah Barikupar Synrem u la kdew ba kan shym la don ka por ba la shna ne ka jingaipor na ka bynta ki inviting tender. U la ong ba ka Council ka dei ban ai biang ïa ki tender lada kim don kiba shim wai ban wan shakhmat.
“Kan wanrah ka jingkylli kaba khraw bha lada ïa ki work order la ai khlem ka jingkhot tender kaba biang,” bynrap u Bah Synrem.
Haba jubab ïa ki jingkylli, u EM ba khmih ïa ka Trade, u Bah Winston Tony Lyngdoh, u la pyntip ïa ka Ïing ba ka Council ka la ai ïa ki work order na ka bynta ki 9 tylli ki check gate bad 10 tylli ki toll gate. U la pynshai ba ïa kine la aiti halor ki application ba la ïohpdiang na kiba kwah ban shim wai.
U la ong ba na ka daw ka jingduna palat ka por, ka EC kam shym la lah ban khot ïa ki tender.
“Kan long kaba ïalam bakla ban ong ba ïa ki work order la aiti tang ïa kito kiba wan ïakynduh ïa nga shimet,” pynshai u Bah Winston.
Katkum ka jingïathuh jong u baroh ki application la phah sha u Secretary ka Executive Committee ban khmih bniah.
“Dei tang ba hadien ba la ïoh ïa ki application na ka ophis Secretary ka tnat kan sa lum sa lang ïa ki thup kyrteng kiba kwah ban shim wai kiba la buh ruh da ka dor kaba heh,” u la ong.
U Bah Winston shuh shuh u la ïathuh ba bun na ki jingïamynjur bad ki jingshimwai ki la dep kut ha ka 30 tarik u Lber, bad ka jingwan ki application na kiba thymmai ka la sdang naduh u bnai Ïaïong.
“Kiba bun ki khyrdop ki la kut ka jingpyntreikam hadien ba la kut ka por ai wai, ha kaba kane ka la wanrah ïa ka jingduhnong ha ka khajna. Kumta ngi la pynïaid shakhmat ïa baroh ki work order sha kito kiba la wan shakhmat,” u la bynrap.
Haba jubab shuh shuh u executive member Bah Winston Tony Lyngdoh u la ong ba ki 9 tylli ki khyrdop talasi ki don ha Beltoli ha East Khasi Hills, Mawlyndep-Umsning, Umsiang, Umïam, Ïongkhuli bad Umdihar ha Ri Bhoi, Athiabari ha West Khasi Hills, Borsora bad Bagli ha South West Khasi Hills.
Haba ïadei bad ka Check Gate ha Umdihar, u EM u la ïathuh ba ïa kane la khang bad ka Executive Committee ka dang ap ïa ka jingthoh na ka sorkar lyngba u Deputy Commissioner ka Ri Bhoi District.
U la pyntip ba kane ka check gate ka don kumba 50 meter sha jngai ka surokbah. Kane ka check gate ha Umdihar la khang khyrdep da ka bor pynïaid distrik halor ka nongrim ba kadei kaba la pynïeng beaiñ ha surokbah.