SHILLONG, Jylliew 27: Shi sngi hashwa ba ki nongïakhun MMA ba kynsai jong ka Jylla Meghalaya kumjuh ruh kiba nabar, kin kiew ha rynsan ïakhun na ka liang jong ki nongpynïaid jong ka Shillong Cage Fighting Championship ha ka sngi Thohdieng (27 tarik Jylliew, 2025) ka la ïoh ban lumlang shi jaka ïa baroh ki nongïakhun na ka bynta ka Face Off.
Ha kane ka sngi ki nongpynïaid ki la ïoh ruh ban pynshai ha kaba ïadei bad ki kyndon kiba ki nongïakhun ki lah ban pyndonkam ha ka por ba ki ïakhun bad kumjuh ruh ïa ki buit ïakhun kiba ki nongpynïaid kim shah ban pyndonkam.
Ïa ka jingpynshai la ai da u Andrew Canday uba dei u International MMA Referee na Mumbai ha ka jingdonlang ki nongpynïaid ka SCFC nalor kiwei kiwei.
Ha kane ka sngi la ïoh ruh ban pynbna ïa ki kyrteng jong ki nongïakhun, ha kaba baroh ki don haduh 28 ngut ba la kynthup lang shynrang bad kynthei. Ka jingpynïakhun kan long ha la ki jong ki jong ki kyrdan katkum ka jingkhia.
Ka jingpynlong ïa kane ka Face off ka long ban pynïakynduh markhmat ïa ki nongïakhun shuwa ka sngi ban ïa aireng, ha kaba ki la ïoh ban ïa khublei, ïakdup bad don ruh katto katne kiba la ïakynrup namar kim lah ap shuh ïa ka sngi ban ïa aireng.
Napdeng kine ki rangïakhun, yn sakhi ïa u wei na ki nongïakhun MMA pawnam ka Jylla, kata u Bah Johny Nongrum, u ban kiew rynsan ban aireng pyrshah ïa u Anurag Singh uba na Uttarakhand.
La khmih lynti ba kane kan dei ka jingïakhun kaba khatduh na ka bynta u Bah Johny Nongrum shuwa ba un shongthait noh na kane ka jingïalehkai.
Ka rynsan ïakhun kaba la tip da ka ‘Shillong Cage Fighting Championship’ kan long ha kane ka sngi Saitjaiñ ka 28 tarik Jylliew, 2025 bad yn pynlong ïa ka ha hall jong ka Lariti Performing Centre kaba don ha Mawkasiang, New Shillong. Ka jingïakhun kan sdang naduh ka por 5 baje janmiet.
