SSA U-20 4th Division: Jop ka Mawnianglah, New Challenger & Riatsamthiah

Shillong, Jylliew 27: Ka Riatsamthiah SC, New Challenger bad ka Mawnianglah SC ki la ïoh ban khur pura ïa ki lai point ha ka lympung ïalehkai Under-20 Fourth Division 2025 jong ka Shillong Sports Association hadien ba ki la jop ïa la ki jong ki jong ki jingïalehkai hynne ka sngi Thohdieng ha madan First Ground-SSA Stadium, Polo.
Ha kane ka sngi la ïoh ruh ban sakhi ïa ka hat trik ba la thep da u Bantyngshain Nongsteng na ka bynta ka Mawnianglah kaba la jop suk da 3-0 kol ïa ka Iateilang SC ha ka Group E.
Haba phai sha ka jingïalehkai kaba nyngkong na ka Group F, ka Riatsamthiah SC ka la jop da 2-1 kol ïa ka Lawei SC.
U Pynskhem Khongdup (4’ & 63’ min) u la pynkhih ïa ar tylli ki kol ban buh hakhmat ïa ka Riatsamthiah. Watla ka Lawei SC ka la ïoh ban pynïakhaid shipor lyngba u Pynbatskhem Marbaniang ha ka minit ba 56 hynrei kam shym la lap pat ban shem ïa ka kol pynïakhaid kaba ar haduh kaba kut jong ka 80 minit.
Kane ka dei ka jingjop kaba nyngkong na ka bynta ka Riatsamthiah, kaba la shah rem ha baroh ar tylli ki jingïakhun ba la dep bad kam shym la thep wat tang shi kol ruh shuwa kane ka jingïakhun. Ka kol kaba nyngkong jong u Pynskhem ka dei kaba 100 ha kane ka samoi bad ka la urlong ha ka jingïalehkai kaba 31 jong ka lympung.
Ha ka jingïalehkai kaba bud na ka Group E la sakhi ïa ka jingjop kaba paka na ka New Challenger kaba la pynjemkhnap haduh 5-0 kol ïa ka Krang.
Kumjuh ka New Challenger kaba la shah rem ha ki ar tylli ki jingïalehkai ba nyngkong ka la lah ban pynskhem ïa ka jingkyrmen ban khur ïa ka jingjop naduh ka kylla step, da kaba lamkhmat ar kol. Kine ki kol la thep da u Victor Langte (19’min) bad u Jernardo Kharhujon (40+3’min).
Haba wanphai ha ka kylla miet u Wanbok Syiemsat (51’min), u Teilang Shylla- (70’min) bad u Beholding Lawai (72’min) ki la pynthikna shi syndon ban khur ïa ki lai point da kaba pynkhih sa lai tylli ki kol.
Ha ka jingïalehkai ba khatduh la sakhi ïa ka jingtrei borbah jong u Bantyngshaiñ Nongsteng uba la khyrwit ïa baroh lai tylli ki kol na ka bynta ka Mawnianglah SC ban pynliem ïa ka Iateilang SC.
ïa kine ki lai kol u Bantyngshain u la pynkhih ha ka minit kaba 4, 44 bad 55, kaba dei ruh ka hat trik kaba ar ha kane ka samoi ba mynta jong ka lympung Fourth Division.
Ka prokram ïalehkai ha kane ka sngi Saitjaiñ yn sakhi ïa ka Mawkasiang pyrshah ïa ka Lapalang, na ka Group C, ha ka por 10:30 baje mynstep, nangta bud sa ka Them Rangshken pyrshah ïa ka Pynthorbah, na ka Group B, ha ka por 1:30 baje mynsngi bad khatduh ka Thynroit kan ïakhun pyrshah ïa ka Mawshbuit, na ka Group A, ha ka por 4 baje janmiet.