Hapoh ka 17 tarik Nailar yn pynkynriah ka sorkar sa ïa ki nongshong die madan ha thaiñ Laitumkhrah

Shillong, Nailar 3: Ka Sorkar Meghalaya ka la pyntip ba kan pynkynriah noh ïa ki nongdie madan na thaiñ Laitumkhrah hapoh ka 17 tarik u Nailar, ong u Symbud Myntri Rangbah ba khmih ïa ka tnat Urban Affairs Ma Sniawbhalang Dhar haba pyntip ba ka Tnad ka la dep ban phah notice bad la ithuh ruh ïa ki jaka hadien ka jingbthah jong ka ïing Bishar.
“Ka jingpynkynriah kan long noh shen. Ngi la dep sam ruh ïa ki notice. Dei ban pynkynriah noh ïa ki hapoh ka 17 tarik u Nailar. Ka don ruh ka hukum jong ka ïing Bishar” ong u Ma Sniawbhalang.
U Symbud Myntri Rangbah u la ong ba ka tnat ka ïatreilang bad ki nongdie madan ban pynthikna baka jingpynkynriah kan ïaid beit ïaid ryntih.
“Ki ophisar jong nga ki la don ha la ka kam. Ngi dang bteng ka jingïakren nga tharai ba baroh kin long kiba bha. Kumba ka long mynta baroh ki kam ki ïaid beit ïaid ryntih” u la ong.
Halor ki jaka ba la ithuh ha Laitumkhrah, u Ma Sniawbhalang u la ong ba la ithuh 2 tylli ki jaka.
“Ngi la ithuh ar tylli ki jaka, kawei ha ka jaka ïeng kali ha Dhankheti bad kawei pat haka bynta jong ka Bungalow ha Barik. Ha ka jingshisha ka dei ka jaka kaba bha na ka bynta jong ki. Lada don ki jingbym biang ngin sa leh ïa kaba donkam ban pynbiang katkum ka jingangnud jong ki nongdie madan”.
Ka Sorkar ka dang ïaid shakhmat ruh ban pynkynriah ïa ki nongdie madan na kiwei pat ki bynta jong ka nongbah.
“Kajuh kan long ïa ka Motphran. Ngi la dep pynkynriah ïaki nongdie madan na Jail Road. Ngi la pynkynriah ïa ki sha Polo bad ha jaka ïeng kali marpyrshah ka SBI. Hadien kata, ngin sa ïa kren ïa ka Motphran bad ka GS Road. Na ka bynta ka GS Road ruh, ngi la ithuh ïa ka jaka kaba don hajan ka jaka ïeng kali ha Iewduh” ula ong.