Hapdeng ki jingshah kynnoh bad shah lynthem maw ka NPP ka la nang khlaiñ: Prestone
![](https://mawphor.com/wp-content/uploads/2022/04/preston-720x430.jpg)
Jowai, Rymphang 03 : Wat hapdeng ki jingshah lynthem maw, ka jingshah krenbeiñ bad ka jingshah kynthoh ha ki party bapher bapher lyngba ki rynsan Social Media u bah Prestone Tynsong uba dei u National Vice President ka NPP ula ong ba ka National People Party (NPP) kan jop haduh 35 tam ki MLA ha kane ka Elekshon 2023 namar kumba long mynta ka party ka la nang khlaiñ nang khlaiñ bad nong ïoh ka jingkyrshan na ki paidbah bad ka lyer jongka ka la nang beh kylleng sawdong.
Ula ong ‘ba ka jylla kala ïaid lynti la 50 snem mynta bad dei tang ka NPP kaba long kata ka National Party hapoh ka Ri naduh snem 2019, kine baroh dei lyngba ka jingkyrkhu ba najrong jong uwei na ki riew saiñ hima sima u (L) Pyrno Sangma bad mynta kane ka seng kala don la ka jong ka ophis treikam ha Delhi bad kane ka dei ka jingburom bad kaba pynehrngiew ïa ka jylla’.
Kum ka seng National Party kan ïaleh katba lah ban ïada ïa ki trai jylla rit paid hapoh ka Ri India baroh kawei, kaba kynthup naduh ka ñiam ka rukom bad ka khyndew ka shyiap, da kaba ula pynsngew ba kiwei ki party ki kut tang ha Khanapara.
U bah Prestone ula ong “kito ki Party ba ïathiah lang mynta kila takor kylla pynban ïa kane ka NPP”, halor kane u Paidbah un sa ai jingsneng ïa kito ki party ba kynthoh ïa ka NPP, da kaba pynsngew ba ka NPP kan ïoh ban shynshar marwei hadien kane ka Elekshon.
Ha kaba ïadei bad ka kam pynbeit ïa u pud u sam hapdeng ka Meghalaya bad Assam ula kren ba naduh ki por mynshwa jong ki sorkar ba rim kala don tang ki jingïakut ‘Status Quo’ bad ki bym shym la poi shano shano ruh “kaba mut shabneng ruh em sha khyndew ruh em”, hynrei dei tang ka sorkar MDA kala lah ban pynbeit noh ïa kane ka kam bad kaba sah ka long satang ka Phase kaba ar.
Halor ka jingshah siat ïap ki nongshong shnong ha Mukroh ha u bnai Naiwieng jong u snem 2022, u bah Prestone Tynsong ula ong kane ka dei tang na ka daw ka jingbym pat pyndep ïa u Pud u sam hapdeng ki ar jylla.
Wat kito ki nonghikai SSA bad kiwei de kiba la duh tulop da ki bun bun bnai hynrei kane ka sorkar kala lah ban pynbeit dang ha une u snem ba la dep. Ula ong halor kine ki kam ba bha kiba la dep leh “phi hun ban klet ïa kine ki jingleh bha jong ka sorkar MDA” ong bah Prestone.
Ula pan ruh ka jingkyrshan sa shisien na ki paidbah ka Jowai Constituency ban kin jied biang ïa u ma Wailadmiki Shylla kum u MLA, khnang ba un dang lah ban ai ka jingshakri kaba bha bad ka jingsngewrit ïa ki paidbah.