Ki soh u kyrtong ka NPP ki la pynkthang ïa ki paidbah: HDR Lyngdoh
Ki dieng Bilat ki sei tang ki soh kthang
Shillong, Rymphang 03: U Myntri Sorkar barim ka jylla u Bah HDR Lyngdoh uba long ruh u kyrtong ka UDP na Sohïong, u la ong ba ka jingkam jong u kyrtong ka NPP ba u long kum u dieng Bilat uba sei soh uba baroh ki kawang maw ban ïoh bam ïa u soh jong u, u Bah HDR u la ong ba ha u hi um pat ju ïohsngew ba uta u dieng Bilat un long uba seisoh kiban long bam hynrei ki soh kiba mih na u ki long tang i soh kthang suda bad lada ïuh ïa kiba hap ha madan ruh kin thar.
“U kyrtong ka NPP u ong ba u long kum u dieng Bilat seisoh hynrei ki soh kiba u dieng Bilat u sei ki long kiba kthang suda bad kiba thar ruh bad ka long shisha kumta ba kine ki soh jong une u kyrtong NPP ka la pynkthang bad ki thar ruh ïa ki paidbah ka Sohïong ha kine ki san snem ba la leit,” ong u Bah HDR ha ka jingïakren bad ki lad pathai khubor.
U la ong ruh ba ha kane ka kynti kaba mynta ynda u jop biang ka kam kaba ha khmat eh kaba la ap lupa ïa u ka dei ban marmaot lut ïa ki jingjot kiba u MLA ba la jop ha u 2018 u la wanrah ha ka Sohïong.
Shuh shuh u la ong ba na ka liang jong u u don ka jingsngewskhem ha kane ka kynti kaba mynta namar ka jingieid ki paidbah ka la wanphai biang sha u.