Hapdeng ka jing iphuh iphieng pynkut noh ka Alpha College of Arts & Commerce ïaka lehkmen ‘Recreation Week’
Nongpoh, Naiwieng 01: Hadien shi taiew lynter ka jingpynlut por haki prokram bapher bapher naduh jingïakop rwai, ka jingpyni ïaki sap ki phong bad kumjuh ka jinglehkai sports nalor ka pule ka puthi kaba ki pynlut por man ka sngi, ki samla pule jong ka Alpha College of Arts & Commerce mynta ka sngi hapdeng ka jingiphuh iphieng kila pynkut noh ïaka taiew lehkmen ki samla pule ne ka ‘Recreation Week’ haka jinglehkmen bala pynlong ha phyllaw jong skul Apha English Higher Secondary School.
Ha katei ka sngi u Bah Mayral Born Syiem MLA ka Nongpoh u la wan ban shim bynta kum u kongsan haka jingdonlang u Bah Balajied Ranee MDC ka Nongpoh, Kong Paidolyne L Nonglait DSEO ka Ri-Bhoi, Pastor KB Kharbteng Principal ka Alpha College of Arts & Commerce, kong WK Blah Principal Alpha English Higher Secondary School, ki nonghikai, ki samla pule bad kiwei kiwei ki riew rangbah.
La sakhi ruh ha katei ka sngi ba ki khynnah da ka jingkmen kila shim bynta haki jingshad, ka rwai ka siaw bad kumjuh ruh ka jingpyninam ïaki riam haka jingïakop Miss & Mr Alpha bala shim bynta shitrhem da ki samla pule jong katei ka College kynthei bad shynrang.
Haba kren ha katei ka sngi ka jingpynkut noh ïa katei ka taiew lehkmen ki samla naka liang u Bah Mayral Born Syiem haba kren kum u kongsan u la pynpaw ba ka Alpha School bad College ka dei kawei naki shlem ai jinghikai kaba paw bad katba dangmih ki sngi katei ka shlem ai jinghikai kala nang kiew bad roi sted haka jingdon ki khynnah bad ki samla pule ban pynphriang ïaka jingnang jingstad haka thaiñ baroh kawei.
U la ong ruh ba nalor ka pule puthi ki samla pule ki donkam ruh ïaka por lehkmen ban ban pyn pyngngad ïaka jingmut jingpyrkhat, hynrei kim dei pat ban klet ban im bad lehkmen haka rukom kaba don akor bad kaba pynsngewbha ïaki kmie ki kpa ban iaid ruh ryngkat bad ka jingpule ba kin long ki samla kiba tip briew tip blei.
U la sneng bad kyntu ruh ïaki samla ha katei ka sngi ba kin shimkhia bad minot ïaka jingpule bad kiar naki jingmlien bad ki jingdih ba sniew kiba ktah ïaka bor met bad kumjuh ruh ka bor pyrkhat, hynrei ban pynkhlain bad ban pyndap ïaki jingmut jingpyrkhat ki ban tei ïaka longbriew manbriew khnang ba shisien ka sngi kin sa long ki khlur kiba tyngshaiñ haka jingim jong ki.
Ha katei ka sngi naka liang u Bah Mayral Born Syiem u la aiti ruh da ka song pisa sha katei ka College kum ka jingdon bynta lang ha katei ka jinglehkmen jong ki samla pule.