Shillong, Jymmang 02: Ka Deputy Commissioner & Chairperson (DDMA) East Khasi Hills District, Shillong kala kyntu ïa ki nongleitkai sngewbha bad ki nongkhwai ha ki wah ba kidei ban khmih ïa ka jinglong jingman jong ka suiñbneng bad ban shim ïa ki lad jingïada ban lait na kino kino ki jingjia kiba sngewsih.
Katkum ka jingpynbna ka DC ka la bthah ban pynthikna ïa ka jingshngaiñ ban lait na kino kino ki jingjia ba sngewsih ïa ki nongleitkai sngewbha sha ki rud wah bad ki nongkhwai ha ki wah la kyrpad ïa ki ba kin khmih bha ïa ka jinglong ka suiñbneng shuwa ban leit khwai doh lane sahkai ne ïaidkjat sharud ki wah.
Dei ban ïathuh ïa ki bahaïing ne ki paralok – shano phin leit bad lano yn wanphai, khmih bha ïa ka um namar ka lah ban kylla ha kano kano ka por bad wat tur ruma sha ki jaka bym shngaiñ kum ki bynta ba jylliew jong ka wah, ki maw ba syntuid bad ki jaka ba jyrsieh, ki kshaid bad kiwei kiwei.
La kyntu ba dei ban phong ki jaiñphong kiba pynper bad rah ki tiar ïada ryngkat bad ka synduk dawai, phong ki juti kiba ïadei ha wah bad bym syntuid bad ban khmih bha ïa ki maw harud wah namar ki lah ban syntuid khamtam ha ka por slap.
La bthah ruh ba dei ban khmih bha ïa ka jinglong ka um shuwa ban khwai, wat leit khwai marwei- leit ryngkat bad ki paralok, wat dih kyaid ne jingdih ba pynbuaid ha ka por ba khwai dohkha.
La maham ruh ba ym dei ban jngi sha ki bynta ba jylliew jong ka wah, watla dei u nongjngi uba tbit bad wat nym kheiñ sting ïa ka bor jong ka um namar ka jingwan kynsan u slap bad ka umsaw, ka jingbtuid jong ki maw ka lah ban wanrah ïa ka jingmynsaw.
