Mawkyrwat, ‘Nailar 24: Kum shibynta ban ai jingpynshai halor ka hok ki khynnah kiba dang hapoh 18 snem ka rta bad kumjuh ban ai jinghikai na bynta ka jingpynkhreh ïa ka lawei jong ki ha ki jingpule bapher bapher, na ka liang ka tnat treikam ne Labour Department, South West Khasi Hills District, Mawkyrwat ka la pynlong ïa ka jingpynshai ne Awareness programme ha ka 22 tarik u ‘Nailar, 2023 ha Mawkyrwat Presbyterian Secondary School, Jakrem.
U bah Shankupar Kurbah, Labour Inspector, Block Labour Office, Mawkyrwat ha ka jingkren jong u, ula batai halor ka Child and Adolescent Labour (Prohibition and Regulation) Act, 1986 kaba ïada ïa ka hok ki khynnah pyrshah ïa ka jingpyntreikam jubor ïa kiba dang hapoh 18 snem, da kaba pynshai ba lah ban ujor sha ki bor ka aiñ ïa ka jingpynkheiñ ïa kane ka aiñ namar ki khynnah ki dang dei ban tei ïa ka lawei jong ki da kaba leit sha ki jaka pule.
U bah Staising Kharbteng, Sub Inspector of Schools, Mawkyrwat ula kyntu ïa ki khynnah skul ba ki dei ban minot ha ki jingpule khnang ba kin lah ban bteng ha ki kyrdan pule kiba kham halor bad ban long ki nongtrei kiba tbit ha ki kam bapher bapher ha ki sngi bad por ban wan, da kaba ai jingmut ïa ki ba ki dei ban kiar ïa ki diengpyngkiang kiba long mawjynthut ïa ka lawei jong ki.
Shuh shuh ula pynshai ruh ba ki khynnah skul kim dei pat ban sngewthuh bakla ba ym bit shuh ban ïarap kam ïa ki kmie ki kpa ne trei ki kam ïing kam sem tang namar ki dei ki khynnah skul hynrei ki dei ban bate ïa ka por jong ki ha ki jingpule, ban trei ki kam ïing kam sem, ka por ban ïalehkai bad ter ter.
