Nongpoh, Naiwieng, 22: Ban ïatai sani halor ki jingshah ktah, ki jingkylla ka suiñ bneng bad ki lad ban ïada ha kaba ïa dei bad ki kam rep ki kam riang, ka Society for Biotic and Environmental Research (SBER), Tripura bad ka College of Agriculture, CAU (Imphal), Kyrdemkulai ki la shim ïa ka sienjam ban pynlong da kawei ka prokram kyrpang halor ka phang ba la tip kum ka ‘4th Biotic Science Congress, 2024, and International Conference on “Climate Smart Farming: Adoption, Impacts, and Implications for Sustainable Development” ba la pynlong ha College of Agriculture Kyrdemkulai, Ri Bhoi District.
Kane ka prokram ka dei ka prokram kyrpang kaba 2 sngi lynter kaba la sdang mynta ka sngi bad yn pynkut noh ha ka 22 tarik u Naiwieng 2024, ha kaba ha kane ka prokram ïa tai ne ïa thir sani halor katei ka phang la wan ban shim bynta da ki khraw pyrkhat, ki nongrep, ki samla pule na kylleng ka ri India.
U Prof. Gautam Saha, Vice Chancellor jong ka BCKV u la wan ban plie ïa kane ka prokram kum u kongsan bad ka Kong Balakyntiew Ranee, Additional Deputy Commissioner ka Ri Bhoi kum ka symbut kongsan.
Kiwei kiwei ki riew shemphang kiba la don mynta ka sngi ki kynthup ïa u Prof. Ram Singh, Dean ka College of Agriculture Kyrdemkulai, u Prof. Pranab Dutta, Chief Organizing Secretary, BioSCon, u Prof. D. Thakuria, Dean jong ka College of Postgraduate Studies in Agricultural Sciences and Convenor, u Dr. B. Chakrabarty, Executive Director ka Bangladesh Agriculture University, u Dr. M. Sehgal, Nodal Officer TSP and NEH ICAR-NCIPM, u Dr. P. K. Chakrabarty, Former ADG (PP & BS) bad kiwei kiwei ki riew shemphang halor ka kam rep ka kam riang.
Ka Kong Balakyntiew Ranee, ka Additional Deputy Commissioner ka Ri Bhoi District kum ka symbud kongsan ka la kren shaphang kata ka jingdonkam ban leh kyrpang ïa ki kam rep ki kam riang kiba dei katkum ka juk stad ba mynta ban kyntiew ïa ki kam rep ki kam riang bad ha kawei ka bynta ruh ka la kren halor ka jingdonkam ban pynthikna ba ngi dei ban lah ban pynbiang ïa ki jingbam lada don kata ka jingïatrei lang na baroh ki liang.
U Prof. Gautam Saha, Vice Chancellor ka BCKV, kum u kongsan u la ban batai halor ka jinglong jingman bad ka jingkylla ka bor mariang ha ki jylla shatei lam mihngi ka ri India, kaba lah ban ktah ïa ka kam rep ka kam riang. Nalor kata u la kren ruh ba la donkam ban pyntreikam ïa kita ki jaid jingthung kiba lah ban pynmih soh shibun wat hapdeng ka jingkylla jong ka bor mariang, ka jingdonkam ban pynneh ïa ki tyllong um bad ban pyndonkam ïa ki kor ki bor katkum ka juk stad ba mynta khnang ba ngin lah ban pynbiang ïa ka jingdonkam ka ri khlem da shaniah na kiwei ki ri.
Lyngba jong kane ka sngi, la sam ruh ïa ki khusnam kyrpang kum ka dak ka jingpynshlur ïa ki Scientist bad ki nongwan bniah (Researchers) kiba la pynlong ïa ka jingwad bniah ha ki phang bapher bapher kiba ïa dei ba ka kam rep ka kam riang.
