Khliehriat, Jylliew, 21: Ki nongïalam ka Joint Action Committee (JAC) Dong Namchiang ki la pyneh beit triang hakhmat ka Additional Deputy Commissioner jong ka East Jaiñtia Hills District Kong J.N.Kharpuri bad hakhmat u Site Engineer ka National Highway Authority of India (NHAI) u Saurav Kumarba kin ym weng ïa ka jingpakhang surok katba kim pat ïohi ïa ka jingshna pynbna ïa ka surok National Highway-6.
Ka Kong J.N.Kharpuri da lade hi ha ka sngi Thohdieng ka la jurip ïa ka jinglong jingman jong ka surokbah National Highway-6 baduh ka shnong Narpuh ter ter shaduh Umkiang bad ïakynduh ruh bad ki nongïalam jong ka JAC Dong Namchiang bad ki paidbah kiba shong hapdeng surok namar ka jingpakhang surok ka dang bteng haduh mynta.
Ka Kong Kharpuri ka la pynpaw dalade hakhmat ki nongïalam ka JAC ba ka surok ka la sniew shaba palat bad kam ym ïohi dak eiei ban maramot ïa ka surok.
Ha ka jingïakren bad nongïalam ka JAC, ka Kong Kharpuri ka la ong ba ka jingpakhang ïa ka surok mynta ka la ktah bad buh jingeh ïa kiwei ki jylla bamarjan namarba ki kali ki la shu ieng da u laiñ ha ki bynta ba hap ha ka jylla Assam namarba ki kali kim lah ban ran shadien ruh ne shakhmat.
U nongïalam ka JAC, Bah D.Pohshna uba dei ruh u MDC barim bad u Waheh Shnong barim jong ka Ratacherra, u la ong “hashwa ban leh ïa kane ka jingpakhang surok ngi la tip bad ngi la sngewthuh bad ngi la tip ruh ba kane ka surok ka dei u budlum jong ka thaiñ Shatei Lammihngi bad kan shah ktah beit hynrei ngim banse namarba ka don ruh ka ktien kaba ong ba kam banse ka thom ïa ka sang. Ngi tip ba kiwei ki jylla kin mad jingeh hynrei katkum ka jingong ki heh sorkar ba ngi don jingkyrmen ba ka surok kan bit kan biang noh kham kloi, hynrei ngi ïohi ba haduh mynta ruh kam don jingseisoh eiei ruh bad na kata kadaw ngim banse ban shim sa da kane ka synjam bad lada ngi weng ïa kane ka pakhnag surok ki paidbah ki ba bun kin nym sngewtynnad namarba kane ka jingpakhnag surok ruh kam dei ka rai kaba mih tang na ki Rangbah Shnong leh hynrei ka dei kaba ki paidbah ruh ki la rai bad ïa shimbynta lang ha kane ka jingïakhih pakhang surok.”
Haba ïakren bad u Site Engineer jong ka NHAI, ka Kong Kharpuri ka la ong ba kam shym la ïohi dak eiei ban maramot ïa ka surok. Ka la ong ruh ba kum ka kynthei ka don ka jingpyrkhat sngewkhia ïa kiwei kiwei ki kynthei khamtam ki bapang ba shitom kiba dei ïaid lyngba na kane ka surok kaba sniew. Ka la bthah ruh ïa u Site Engineer ba u dei ban leh kloi ïa ka kam ban pyndap ïa ki jaka kiba la long thliew hapdeng surok.
U Site Engineer u la kam ba ki nongtrei ki la sdang trei ïa ka kam haduh 10 kilomitar, kata, naduh Lumshnong terter bad la buh ruh haduh shiphew tylli ki trok Dumper ban kit ïa ki maw, ka khyndew na ka bynta ban pyndap ïa ki jaka ba la long thliew. Ka ka Kong Kharpuri ka la bynrap biang ba kam ïohi dak maramot eiei ruh ha ka surok ba la jot la pra.
U Site Engineer u la ong ba na ka daw ka jinghap slap bad ka jingjur ka jingtwa khyndew ha ka thaiñ na kata ka daw ki jaka ba ladep pyndap ruh ki la shah kit lang noh ha u slap bad jingtwa khyndew. U la ong ruh ba ïa kane ka jingmaramot yn sa lah ban pyndep biang tang hapoh lai ne saw sngi.
Ka sur jong ki paidbah ka la mih ba ki briew jong ka NHAI ki shu kular kai beit manla ka por khlem da poi shano shano ruh bad mynta ka JAC bad ki paidbah kim lah shuh ban shaniah ïa ki jingkular thok jong ka NHAI bad ong ruh ba ïa kane ka pakhang surok kim pat lah satia ban weng tat haduh ba ka surok kan da bha ban long ban ïaid ki kali.
Ka jingpakhang surok ba khlem pud sngi da ka JAC mynta ka la kynjoh sha ka sngi kaba lai bad ka JAC ka la ïoh ruh ïa kajingkyrshan na ki kynhun bapher bapher.
