Haduh 90 persent na ka ram la siew da ka sorkar pdeng bad tang khyndiat siew ki sorkar jylla

Shillong, Jylliew 20 : Ka Myntri Pla Tyngka ka Sorkar Pdeng, ka Nirmala Sitharaman, ka la ong ba ki Externally Aided Projects (EAPs) ki la noh synniang shibun eh na ka bynta ban kyntiew ïa ka roi ka pa lane ban pynkylla dur ïa ka jingkiew shaphrang jong ki jylla, khamtam eh ha ki jylla jong ka thaiñ Shatei Lam Mihngi.
Haba kren bad ki lad pathai khubor ha ka janmiet sngi Thohdieng ha Shillong, ka Myntri ka la batai ruh halor ka rukom treikam jong ki EAP da kaba ong ba haduh kumba 90 persen na ka ram la pynsiew pat da ka Sorkar Pdeng, katba ki jylla ki hap ban kit tang kumba 10 persen. Katkum ka jingong jong ka, ka Sorkar Pdeng ka la kitkhlieh ïa kaba bun na katei ka jingpynlut pynsep jong ka projek, kaba long ka jingmyntoi kaba khraw bha ïa ki jylla jong ka thaiñ Shatei Lam Mihngi.
“Kumta ka la ai ka jingmyntoi kaba khraw ïa ki jylla khamtam ïa ka thain shatei lam-mihngi jong ka ri namar kumba nga ong ba ka sorkar pdeng ka la siew kumba 75 persen na baroh ka ram,” ka la bynrap biang.
Shuh shuh ka la ong ba kine ki projek ki la ai jingmyntoi beit beit ïa ki jylla kum ka jingshna ïa ki jingtei kiba kongsan kiba long ka jingmyntoi ïa ka imlang sahlang la ka long naduh ki skul, ki jaka pule bad kiwei kiwei.
Haba kren shaphang ki snem hadien ka jingwan ka khlam COVID-19, ka Sitharaman ka la ong ba ka jingïarap jong ka Sorkar Pdeng lyngba ka Special Assistance to States for Capital Investment (SASCI), kaba ai ram khlem sut haduh 50 snem, lem bad ki projek lyngba ka EAP route, ki la ïarap shibun ban pynkloi ïa ka jingroi jong ki jylla ha ka thaiñ Shatei Lam Mihngi.
Ka la ong ruh ba ha kine ki phra snem kiba la leit noh hadien ka khlam COVID-19, ki jylla ki la ïoh jingmyntoi na ka skhim Special Assistance to States for Capital Investment (SASCI), kaba ai ram khlem sut haduh 50 snem, bad ruh na ki projek ba la pyntreikam lyngba ki EAP. Kine baroh ki la noh synniang shibun ha ka jingpynroi ïa ki jylla jong ka thaiñ.
Hynrei, ka la kdew ba watla ki jylla ki la ïoh jingmyntoi, hynrei ka jinglah ban pynkhreh bad pyntreikam kloi ïa ki projek, ban pyndep ïa ki ha ka por kaba biang bad ban don ïa ka jingïaid beit jong ki projek thymmai ka dang pher na kawei ka jylla sha kawei pat.
Namarkata, ka la ong ba la pynlong ïa ka seminar kaba ar sngi ha kaba baroh ki Myntri Rangbah jong ki jylla ka thaiñ Shatei Lam Mihngi ki la wan jingïashim bynta. Ha kane ka jingïalang la ïakren halor ki lad ban pynkhlaiñ ïa ka bor treikam jong ki jylla bad ban ïasam ïa ki rukom treikam kiba seisoh ba lah ban bud da kiwei pat.
Ka la ong ba baroh ki jylla ki la wan jingïashim bynta ha kane ka jingïalang. Watla u Myntri Rangbah ka Manipur bad u Myntri Rangbah ka Arunachal Pradesh kim shym la lah ban wan, hynrei ki jylla jong ki ki la phah ïa ki heh ophisar ban mihkhmat.
Ka Myntri Pla Tyngka ka la ïoh ruh ban don bynta ha ka jingplie paidbah ïa kawei ka projek kaba heh kaba ïadei bad ka jingshna ïa ki musli musla.
Shuh shuh, ka la pynpaw ïa ka jingsngewkmen hadien ba ka la leit jngoh ïa kawei ka stadium kaba itynnad bha, da kaba ong ba ka jingitynnad bad ka jingheh jong ka ka pynlong ïa ka ban sngewkmen haduh katta katta.
Ka Sitharaman ka la ïashim bynta lang shipor ban shna khiew khyndew tynrai bad ka la ai jingïaroh ïa kane ka sap tynrai kaba kyrpang, namar ïa ki khiew la shna da ki kti ym da ka kor shna khiew, kaba pyni ïa ka jingriewspah jong ka kolshor bad ka bynta jong ki paidbah ban pynneh pynsah ïa ki jinglong tynrai.