South Africa, Rymphang 19 : Ka kynhun ïalehkai Hockey jong ki Junior ka ri India ka la pynliem kput da 8-0 kol pyrshah ïa ka South Africa ha ka jingïalehkai kaba ar ha katei ka jingleit ïalehkai sha South Africa.
Dang ha ka taïew ba lah dep, ka kynhun ïalehkai jong ka ri India ka la sdang ka jingïaid lynti jong ka da kaba khur jingjop da 8-1 kol.
Katei ka jingleit ïalehkai sha South Africa kadei kum shi bynta ka jingpynkhreh jong ka kynhun na ka bynta ka lympung ïalehkai Asia Cup U21, kaba dei ka jingïalehkai ïakob knieh rng sha ka lympung FIH Women’s Hockey Junior World Cup.
Ka India ka la sdang ban ïalehkaki bha naduh ka quarter kaba nyngkong da ka rukom ïalehkai kaba itynnad ha ka liang ka jingïalehkai ba shakhmat. Ka kol kaba nyngkong ka la wan ha ka jingïalehkai ba dang ïaid shi minit lyngba ka Annu bud pat sa ha ka jingïalehkai ba 9 minit ba la thep da ka kapten jong ka kynhun ka Rujata Dadaso Pisal ha ka jingïalehkai ha ka miet sngi Saitjaiñ.
Ka kynhun ka la bteng biang ban lamkmat da 3-0 ha ka minit ba 26 lyngba ka Jyoti Chhatri. Ka la thep pat sa shi kol ha ka minit kaba bud ban ïalam ïa ka kynhun ban lamkhmat da 4-0.
Shuwa ban kut ka quarter kaba ar, katei ka kynhun ïalehkai Junior jong ki kynthei ka ri India ki la thep sa ar kol ha ka minit ba 29 bad 30 lyngba ka Deepika Soreng bad ka Jyothi Chhatri.
Hadien ba ka la ïoh ban lamkhmat da 6-0 kol, ka India ka la pynkut ïa ka jingïalehkai jong ka quarter kaba saw da kaba thep sa ar kol ha ka minit ïalehkai ba 54 bad 59 ba la thep da ka Annu bad ka Deepika Sr.
Ka India kan sa ïalehakai biang ha ka 20 tarik Rymphang bud pat sa ar tylli ki jngïakun pyrshah ïa ka South Africa “A’ ha ka 24 tarik bad 25 tarik Rymphang.
