Hadien ka elekshon MLA 2028 yn sa pynkylla nongïalam ka Congress ha Meghalaya : Pala

Shillong, Iaiong 29 : U President ka Meghalaya Pradesh Congress Committee (MPCC) u Bah Vincent H Pala ha ka sngi Ba-ar, ula kyntait ïa ki jingïakren ba kan don ka jingpynkylla ïa ki nongïalam hapoh ka Jylla haba pynpaw ba ka samoi treikam jong u kan kut haduh u 2028.
Haba kylli ïa ka jinglah ban kylla nongïalam bad u briew ban shimti, u bah Pala ula ong “Ka samoi trei kam jong nga kam pat kut satia. Ka samoi jong nga kan kut haduh u 2028. Hadien ba wan u 2028, khlem pep ngin sa jied ïa kiwei ki nongïalam kata hadien ka elekshon Assembly”.
Ula pynpaw ba kano kano ka rai halor u President ba thymmai ka MPCC yn sa shim da ka jingïamynjur lang. “Ka party kan sa shim rai” ula ong.U Bah Pala ula ong ba ka Congress kam duna satia ïa ki briew ban ïalam ïa ka party ha Meghalaya.
“Hooid, ngi don bun ki nongïalam ha ka Congress. Ngi don ka Deborah Marak, ka nongïlam bala rangbah bha, ngi don ruh ïa u Saleng A Sangma uba dei u MP ka Tura, ngi don ïa u Bah Manuel Badwar, Secretary ka PCC,bad ngi don ruh bun ki District President. Kumta, ngim don jingduna satia haba phai sha ki nongïalam” ula ong.
Haba tynruh mano ban shimti bujli na u, une u President ka MPCC ula kyntait ban jer ïano ïano ruh.