Hadien ba ujor sha NHRC, khot hajir u SDO ïa ka Hima Sohïong bad u samla ba shah shoh ha ki nongap pahara

Nongpoh, Ïaïong 17: Ki nongïalam ka Hima Sohiong ryngkat u samla Noreshor Timung u ba la shah shoh haki nongtrei ka tnad Forest jong ka Assam haka 30 tarik Naitung jong u snem 2025 mynta ka sngi kila shah khot hajir ha u SDO ka Patharkhmah Civil Sub-Division kaba dei ruh naka jingbthah jong ka National Human Rights Commission hadien ba naka liang ka Shnat Hima Nongwah Mawtamur Sohiong Lyngdohship kala dep ban ujor sha katei ka Commission halor katei ka jingjia.
Lah ruh ban pynkynmaw ba uwei u samla bala tip kyrteng kum u Noreshor Timung naka shnong Garo Banga (Amreng) kaba dei ka shnong khappud bad ka jylla Assam kaba hap ha Jirang Constituency, Ri-Bhoi District u ba dei ruh u nonghikai skul u la shah kem haki bor pahara jong ka tnad Forest ka jylla Assam haka 30 tarik Naitung 2025 naka shnong Umshalani bad patan beit ïa u ban thep sha kali ryngkat ka bom ka shoh dusmon haduh ba un da mynsaw bad rah ïa u sha Lokhra.
Haba kren sha ki lad pathai khubor naka liang u Bah Rastingwell Thabah Chairman ka Hima Sohiong Bah PL Thabah Lyngdoh Sohiong kila ong mynta ka sngi kila leit ban ïakynduh ïa u SDO ka Patharkhmah Civil Sub Division namar ka jingshah ban beiñ bad shah shoh beiñ ki khun ki hajar haki thaiñ khappud hadien ba ka Hima kila leit ban ujor sha ka NHRC halor ka jingshah shoh dusmon uwei u samla namar kum ka Hima ka sngewkhia bad don ka jingkitkhlieh halor katei ka jingshah lehbeiñ ki briew kiba shong ha khappud Assam.
Kila ong ruh ba kum kine ki jingjia kim dei shuh kiba dang thymmai namar ki paidbah haki thaiñ khappud ki ju mad jingeh naka por shaka por dei halor katei ka bynta naka liang ka Hima ka shimkhia ïa kane ka jingjia bad ban ioh ka jingbishar kaba hok bad u la pyntip ruh ba naka liang ka NHRC ka ai por 4 taiew ïaka bor district ban pyndep ïaka tohkit halor katei ka jingjia bad naka liang ka Hima ka don ruh ki sakhi satar naduh ki dur bad ki durkhih bala aiti sha ka bor district halor katei ka jingshah thombor ryngkat ki slip dawai ba utei u samla la shah sumar namar ka jingmynsaw na katei ka jingshah shoh.
Naka liang ka Hima kala shimkhia ruh ïa katei ka kam namar kam kwah ba ka Assam kan shu leh katba mon ïaki jaka ki puta bad ki paidbah kiba shong ba sah ha khappud kin shah ban beiñ bad shah ktah kti.