Hadien ba bishar ïa ka jingbatai ka Tactical Team – I yn sa pynshitom ïa kiba donkti

Shillong, Iaiong 10 : U Symbud Myntri Rangbah ka jylla uba dei peit ïa ka tnad kam pohïing u bah Prestone Tynsong u la ong mynta ka Lah Sngi U Blei ba ka sorkar kan sa rai ban ai jingpynshitom ïa kiba donkti ban siat iap ïa u bah Cherishterfield Thangkhiew General Secretary ba rim ka seng Hynniewtrep National Liberation Council (HNLC) tang hadien ba ka la dep ban bishar ïa kaei kaba ka Tactical Team -I ka ai jingbatai bad pynshai hadien ba ka tnad kam pohïing ka la pan na katei ka kynhun kaba leit khynra ia ka ïing u bah Thangkhiew ha ka 13 tarik Nailar 2021 kaba la wanrah pynban ka jingshah siat iap jongu. “ Ai ba ka kam kan ïaid shakhmat. Kumba long mynta ka tnad ka dang shu ïoh pdiang ïa ka jingjubab bad jingbatai na ka Tactical Team -I. Ngin hap ban pule bad bishar bniah bha ïa ka. Hadien kane ngin sa shim rai kaei ka jingpynshitom yn ai ha kito kiba donkti” ong u Symbud Myntri Rangbah.
ïa kane ka jingpan jingbatai pynshai na katei ka kynhun ba leit khynra la leh hadien ba la wanrah ïa ka kaiphod jingtohkit jong u Justice T Vaiphei hapoh ka ïing Dorbar Thawaiñ ka jylla ha ka Dorbar Synrai jong u snem ba la dep.
Ha katei ka kaiphod la kdew shai ba ïa kane ka jingkhynra la pynkhreh sani bha hynrei ka jingpyntreikam kam long kaba biang namar katei ka kynhun ka dei ban leit kem im ïa u bah Cherishterfield.
Kumta ha katei ka kaiphod jong u Justice Vaiphei la kdew shai “ Kumta ka jinglap jong nga ka long ba ka Tactical Team -I kaba leit khynra ban kem ïa u ha katei ka 13 tarik Nailar 2021 ha ka por 3 baje mynstep ka khlem da pyrkhat sani bha bad ka la pyndonkam palat ïa ki bor pahara ruh kaba la wanrah ïa ka jingiap jong u bah Cherishterfield kaba lah ban kiar ha ka jingshisha”.
Kumta ha ka jingbishar jongu Justice Vaiphei u la shem ba ka daw ka long ba la shu pynlong kyrkieh bad thurmur ïa ka jingkhynra da ka Taxtical Team I. Namar ka jingthmu jongka jingleit khynra ka long beit ban kem im ïa u ym ban siat iap ïa u.Namar kane ka dei ka rai ba la shim da ka Tactical Team ha ka jingïakynduh kum ka kynhun shwa ban leit khynra bad kem ïa u bah Thangkhiew.
Ka long ka jingkhynra kaba kyrkieh bad thurmur ha ka jingshisha ban da dei ba kem im ïa u u la ïoh ban ai jingtip shibun sha ki pulit halor ki jingthmu bad ki kam ba ka seng HNLC ka pynkhreh ba leh” pynkut ka kaiphod.