Yn lum ïa baroh ki Party, ïa ka MDA bad Kynhun Myntri ban ïatai halor ka Roster System : Dy CM

Shilong, Iaiong 10: U Symbud Myntri Rangbah ka jylla uba dei ruh u National Vice President ka National People’s Party (NPP) U Bah Prestone Tynsong ha ka sngi Nyngkong u la pynpaw ba kam donkam satia ban khot dorbar kyrpang na bynta ka jingïatai ïa ka Roster System.Hynrei lah ban khot ïa ka jingïalang jong baroh ki Seng Saiñ Pyrthei, ka MDA bad kumjuh ruh yn ïakren hapoh ka Kynhun Myntri.
Haba kren sha ki lad pathai khubor u Bah Prestone u la ong ba ha ka ka jingsngew jong u u sngew ba kam donkam ïa ka dorbar kyrpang na bynta ban ïakren ïa kane ka mat hynrei u ong ba na ka liang ka sorkar kan sa ïakren lada donkam dorbar kyrpang ne em tang shu wan phai u Myntri Rangbah ka jylla u Conrad K Sangma sha Shillong.
“Ngam ïohi ban donkam dorbar kyrpang ban ïakren ïa kane ka mat hynrei ngin ïakren ïa kane ynda u Myntri Rangbah u wanpoi ha Shillong,” ong u Bah Prestone.
“Na ka liang ka sorkar kan sa lum ïa ka jingïalang jong baroh ki seng saiñ pyrthei ban ïakren ïa kane ka mat jong ka Roster System,” u la bynrap.
U Bah Prestone u la ïathuh ba na ka liang ka sorkar shuwa ban khot ia ka All party Meeting kan sa lum shuwa ïa ka jingïalang ki kynhun ba don ha ka MDA hadien ba ka Kynhun Myntri kan shong jingïalang.
“Ngin sa lum ïa ka jingïalang ka MDA hadien ba ka kynhun Myntri ka la dep ban ïatai sani ïa kane ka mat bad lada i donkam lehse ngin khot ïa ka All Party Meeting kumba nga la kren,” ong u Bah Prestone.
Haba kylli halor ka hukum ba ka High Court ka la kdew ba ka shong ha ka sorkar bad ka ïingdorbar Thaw aiñ ban pyntreikam ïa ka Roster System naduh u snem katno, u Bah Prestone u la ong, “Ngi la dep ban file ïa ka Affidavit jong ngi haduh laisien ha khamt ka Meghalaya High Court haba ka shong bishar ïa kato ka mokotduma ba ka la dep ai rai bishar ha u snem uba la lah bad dei ka High Court hi kaba hukum ba ka Roster System dei ban pyntreikam naduh u snem 1972 kata naduh u snem ba la sdang pyntreikam ïa ka Reservation Policy”.
“Ha kaba ïadei bad kane ka hukum ba ka High Court ka dang pynmih ngin ïakren shuwa ha ka Kynhun Myntri, nanagta ha ka jingïalang ka MDA bad hadien ngin lum ïa ka all party meeting lada i donkam ban ïatai ïa kane ka mat,” ong u Bah Prestone.
Haba ïadei bad ka jingdawa ba ka jingpyntreikam ïa ka Roster kan dei beit naduh ba mih ka hukum ban wanrah ïa ka Roster System ha ki jingthungkam katkum ka Reservation Policy ym ban kyrtiang dien shaduh u 1972 u Bah Prestone u la ong, “Nga mynjur ba ym dei ban kyrtiang dien shaduh u 1972 ban pyntreikam ïa ka Roster System hynrei ba dei ban pyntreikam shakhmat naduh ba wanrah ïa ka Roster System bad na ka liang ka sorkar ruh ngi don kane hi ka jingmut bad ngi la file ïa ka affidavit hapoh ka High Court ba ka jingpyntreikam ïa ka Soster kan dei naduh ba la mynjur ïa ka sha khmat ym ban kyrtiang dien shaduh u 1972”.
Haba kren halor ka jingdawa ban pynbeit biang ïa ka Reservation Policy u bah Prestone u la ong ba ka sorkar kan shim shuwa kawei kawei ka mat ban ïakren bad ban pynurlong.
“Ngin shim shuwa ïa mynta ïa ka mat jong ka Roster System bad ngin kren ïa kane ka mat (reservation Policy) kham hadien,” ong u Bah Prestone.
Lah ban kdew ba kane ka jingdawa dorbar kyrpang ka la khluit bha hadien ba Ka High Court ka Meghalaya ka la ong ba ka shong ha ka Ïingdorbar Thawaiñ ka jylla bad ka sorkar lano kan pyntreikam ïa ka Roster System ha ka Reservation Policy jong ka jylla Meghalaya.
Ka High Court haba shim bishar ïa ka PIL jong u Greneth Sangma, ka ïingbishar jong u Chief Justice Sanjib Banerjee bad u Justice W. Diengdoh, ka ong ba kadei kamram jong ka Assembly bad ka sorkar ban ïakren bad ïatai halor ka Roster System bad kam shym la buh kano kano kano ka por ban pyntreikam ïa ka.
Ka ïingbishar ka la ong ruh ba kadei ka jingtreikam jong ka sorkar lane ka polisi treikam jong ka ba kan shim ïa ka rai haduh katno ka lah ban ran shadien ban pyntreikam ïa kane ka System.