Hadien 57 snem la pynkhyllem noh ïa ki atoskhana ka MCCL
Kynnoh ba thmu lilam noh ka sorkar ïa ki tiar barim
Sohra, Nohprah 12: Hadien 57 snem, ïa ki atoskhana ba ju thang ban pynmih dewbilat ha Mawmluh Cherra Cements Limited (MCCL) ka pynkhyllem noh jraiñ mynta ka sngi hapdeng ka jingbynnud jong ki paidbah ka Shnong Mawmluh bad ka thaiñ Sohra.
Ki khubor ba la ïoh ki ïathuh ba kane ka jingpynkhyllem jong ka sorkar ïa kine ki atoskhana kadei ka jingthmu ban die lilam noh ïa ki tiar ki tar kiba la rim ha kane ka karkhana pynmih dewbilat kaba la don mynta la 57 snem.
Haba pyrshang ban kylli ïa kane na ki bor pynïaid ka MCCL, ym shym la ïoh satia ban pynthikna ïa kane ka jingkynnoh ba thmu lilam nih ïa ki tiar ki tar.
Lah ban kdew ba kane ka karkhana kaba mynta ka la don hapdeng ka jingtroiñ kaba jur, la seng ha ka snem 1966 ha ka por jong ka sorkar Assam da ka jingthmu ban aikam aijam ïa ki briew ha Sohra namar ka jingbym long ka rep ka riang. Ha kine ki phew snem ba la leit kane ka karkhana ka la aikam aijam ïa ki spah ngut ki nong Sohra bad kumjuh ruh ïa ki briew kiba na shabar.
Ka dewbilat kaba mih na kane ka karkhana kaba la shna na kata ka wet process kadei ka dewbilat kaba bha bad kaba la pawnam ym tang ha ri India, hynrei wat ha ka pyrthei ruh baroh kawei.
Pynban katba nang mih ki snem kane ka karkhana ka la nang hiar arsut bad ka la nang troiñ nang troiñ, ha kaba la pyrshang ban pynthymmai ne modernise ïa ka da kawei ka sorkar hadien kawei pat.
Dei tad ha ka snem 2014 haba la wan ka jingkhang tih dewïong da ka NGT ha ka jylla Meghalaya ba kane ka karkharkhana ka la ïakynduh ïa ka jingeh kaba imat kan nym lah shuh ban khie khlieh syndon, namar ba la hap ban khang ïa ka karkhana namar ka jingbym ïoh dewïong. Hadien kane haba la shimti lei lei ka sorkar MDA, kane ka karkhana ka la dkoh treikam bha, namar ba kane ka sorkar kam i don jingthmu satia ban pynbha ne ban khyllie biang ïa ka jingtreikam kane ka karkhana.
Ka sien kaba khatduh ba ka sorkar ka la pynbna ka long ban aiti noh sha ki kompeni shimet ne ban Privatise noh ïa ka, ha kaba la aiti sha kawei ka Kompeni kaba na Kolkata, hynrei haduh mynta ym ïohi dak eiei tad haduh kane ka jingpynkhyllem ïa kine ki atoskhana.